د نیمروز ولایت په شپږمه او اوومه ناحیو کې د ښاري تخلفاتو د مخنیوي په موخه څارنه ترسره شوه
۱۴۴۷/۱۰/۱۳
د نیمروز ولایت د کور او ښار جوړولو ریاست اړوند د ښاري تخلفاتو د مخنیوي او د ساختماني او زېربنایي پروژو د تطبیق د څار ټیم له لوري، د یاد ولایت په شپږمه او اوومه ناحیو کې ساحوي څارنه ترسره شوه.
دغه څارنه د کور او ښار جوړولو وزارت اړوند د ښاري سرغړونو د مخنیوي او د پروژو پر تطبیق د څار محترم عمومي ریاست د هدایت پر بنسټ ترسره شوه.
له یادې څارنې موخه دا وه، چې په یادو سیمو کې د ښاري اصولو د تطبیق وضعیت وڅېړل شي او د غیرقانوني ساختماني فعالیتونو مخه ونیول شي.
د نظارت په ترڅ کې څرګنده شوه، چې په یادو ساحو کې یو شمېر ساختماني چارې روانې دي، خو د ترسره شوو ارزونو له مخې دغه پروژې د منظور شوو ساختماني نقشو او د کار د قانوني جوازونو څخه بې برخې دي.
همدارنګه ټینګار وشو، چې په یادو ساحو کې تر هغې چې منظم ښاري پلان ترتیب نه شي، هر ډول اعمار او ساختماني فعالیتونه باید ودرول شي.
دا څارنه د دې لپاره ترسره شوه، چې د ښاري تخلفاتو مخه ونیول شي او د ښار جوړونې اصولو سره سم منظم ښاري پراختیا تأمین شي.
