د کابل په نوي ښار کې د سرطاني ناروغانو د روغتون د ودانۍ د څارنې لارښود ترتیب شو
۱۴۴۷/۰۶/۲۳
د کابل په نوي ښار کې د سرطاني ناروغانو د روغتون د ودانۍ د څارنې کمیټې، چې مشري یې د کور او ښار جوړولو وزارت د مسکن، ودانیزو چارو او برنامو د پراختیا د محترم مرستیال الحاج مولوي ګل زرین صابر کوله خپل لارښود ترتیب او بشپړ کړ.
یاده کمیټه چې پکې د مسکن د معینیت څو عمومي رئیسان، د اطلاعاتو او کلتور، عدلیه، کورنیو چارو، اقتصاد او د عامې روغتیا وزارتونو، د عمومی ادارو رئیسانو او د استخباراتو ریاست استازي هم شامل وو، څو غونډې ترسره کړې او د ټولو نظریاتو او وړاندیزونو د راټولولو وروسته، لارښود یې په «۸ فصلونو او ۴۸ مادو» کې نهايي کړ.
په وروستۍ غونډه کې، چې د مسکن د محترم مرستیال په مشرۍ ترسره شوه، په دې ټینګار وشو چې د اسلامي امارت د محترم ریاسة الوزرا د حکم د تطبیق په اساس، یاد لارښود د کمیټې د غړو د لاسلیک وروسته د تائید لپاره د کور او ښار جوړولو وزارت ته واستول شي.
په لارښود کې د څارنې څرنګوالی شامل دی او ټولې اړوندې برخې لکه مالي، تخنیکي، چاپیریالي، حقوقي، طرح او ډیزاین، او همدارنګه د روغتون د جوړیدو وروسته د استفادې څرنګوالی پکې په پام کې نیول شوی دی.
یاده روغتون به په یوولس جریبه ځمکه کې د کابل د نوي ښار په محدوده کې جوړ شي، چې اوس مهال د ودانۍ د ساحې د احاطې چارې بشپړې شوې دي.
د یادونې وړ ده چې د دې نه مخکې د محترم رئیس الوزرا په حکم، یوه کمیټه د کور او ښار جوړولو وزارت په مشرۍ جوړه شوې وه او پکې د اطلاعاتو او کلتور، عدلیه، کورنیو چارو، اقتصاد او د عامې روغتیا وزارتونه، د عمومی ادارو رئیسانو او د استخباراتو ریاست استازي هم شامل وو،ترڅو د عطا خیریه بنسټ د سرطان ناروغانو روغتون د ودانۍ ټول مالي، تخنیکي او چاپیریالي برخې څارنه، ارزونه ترسره کړي.
