د ښار جوړولو او ځمکو وزارت سرپرست د نوي کابل ښار له پانګوالو سره وکتل
۱۴۴۳/۱۰/۲۶
د ښار جوړولو او ځمکو وزارت محترم سرپرست مولوي حمدالله نعماني، د دغه وزارت د پلازمېنې پراختیا زون مرستیال قاري روح الله او د وزارت یو شمېر نورو تخنیکي او مسلکي لوړ رتبه مسؤلینو د نوي کابل ښار له پانګوالو او پراختیا ورکوونکو سره وکتل او هر اړخیز بحثونه یې وکړل.
په دغه دوه اړخیزه ناسته کې پانګوالو او پراختیا ورکوونکو د نوي کابل ښار فعالیتونو برخه کې د شته ستونزو او ننګونو په اړه خبرې وکړې او د خپلو وړاندیزونو ترڅنګ یې د وزارت د همکارۍ غوښتنه وکړه.
په ناسته کې د هر اړخیز بحثونو په دوام د ښار جوړولو او ځمکو وزارت محترم سرپرست مولوي حمدالله نعماني پانګوالو ته په خطاب کې وویل، وزارت یې له ټولو هغه ملي او نړیوالو پانګوالو بشپړ ملاتړ کوي او اسانتیاوې ورته برابروي چې وغواړي د دې وزارت په چوکاټ کې په افغانستان کې پانګونه وکړي.
د ناستې په پای کې پرېکړه وشوه چې د نوي کابل ښار د پانګوالو او پراختیا ورکوونکو او د وزارت د هراړخیز تخنیکي او مسلکي ټيم څخه به یوه ګډه کمېټه جوړه شي، د نوي کابل ښار د فعالیتونو برخه کې به هر اړخیزه څېړنه وکړي، له پانګوالو سره به شوي تفاهم لیکونه له سره وګوري چې څنګه کېدای شي اسانتیاوې رامنځته او چارې ګړندۍ کړي.
وزیر وویل، دوی ټول فکر دې ته کوي چې پانګوالو او هېوادوالو ته د ګټې زمینه برابره شي او اقتصادي څرخ په چلېدو راشي.
