د ډرون فوتوګرامیټري ښوونیز پروګرام پای مراسم ترسره شول
۱۴۴۷/۰۸/۰۷
د کور او ښار جوړولو وزارت د کار کوونکو چارو محترم ریاست په اقدام د ډرون له لارې د فوتوګرامیټري ښوونیز پروګرام په بریالیتوب سره پای ته ورسېد.
ګډون کوونکو ته د کور او ښار جوړولو وزارت د محترم مالي او اداري مرستیال الحاج محمد ارسلاح خروټي لخوا تصدیقپاڼې وویشل شوې.
په دې پروګرام کې تقریباً (۳۷) کسانو برخه اخیستې وه او په مسلکي توګه یې ټول تعلیمي او عملي فعالیتونه بشپړ کړل.
د کور او ښار جوړولو وزارت د کارکوونکو چارو ریاست محترم رئیس مولوي عبدالولي ارکاني د پروګرام په پیل کې وویل، د ظرفیت لوړونې دا ډول پروګرامونه د کار کوونکو د مسلکي وړتیاوو د لوړولو، د عصري ټکنالوژۍ په کارولو، او د ودانیزو او ښاري چارو د کیفیت د ښه کولو لپاره اړین دي.
د کور او ښار جوړولو وزارت محترم مرستیال الحاج محمد ارسلاح خروټي، ګډونوالو ته د روزنې په اهمیت خبرې وکړې، د ښوونکو هڅې او فعالیتونه یې وستایل او یاد پروګرام یې د هېواد د پرمختګ لپاره اړین وباله.
محترم محمد ارسلاح خروټي وویل، نړۍ د ټکنالوژۍ په مرسته خورا پرمختګ کړی او افغانستان هم ورته مسلکي او پوه کار کوونکو ته اړتیا لري.
نوموړي په تخنیکي برخو کې د لا زیاتو ښوونیزو او روزنیزو پروګرامونو پر اړتیا خبره وکړه، چې په خبره یې چارې به لا اغېزمنې کړي.
هغه وویل، دا پروګرام د کور او ښار جوړولو وزارت له لوري د ۳۷ انجنیرانو لپاره جوړ شوی و، چې د تخنیکي او عملي مهارتونو په لوړولو کې مرسته کوي او ګډونوالو ته یې د مسلکي زده کړو مهم فرصتونه برابر کړل.
د کور او ښار جوړولو وزارت د کار کوونکو چارو ریاست په تېر یوه کال کې شاوخوا ۶۰۰ د نورو ادارو کار کوونکو ته د ظرفیت لوړونې روزنې ورکړي او په ۳۳ ولایتونو کې ۳۹۷ کسانو او په مرکز کې یې ۲۸۴ کسانو ته په بېلا بېلو برخو کې روزنه ورکړې ده.
د غونډې په پای کې ټولو ګډونوالو ته تصدیق پاڼې ووېشل شوې.
