د پکتیکا ارګون ولسوالۍ کې ښاري سرغړونې شوي دي
۱۴۴۶/۰۸/۲۴
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني په رالېږلو معلوماتو کې لیکلي، د ریاست اړوند تخنیکي ټیم یې پکتیکا کې د کور او ښار جوړولو ریاست محترم رئیس مولوي محمد طاهر سیف الجهاد په همکارۍ او لارښوونه د دغه ولایت ارګون ولسوالۍ کې له ښاري تخلفاتو د مخنیوي په موخه څارنه وکړه.
ښاغلي مولوي حقاني لیکلي، د پکتیکا ولایت په ارګون ولسوالۍ کې، د هشترخ په تاریخي سیمه کې خپلسرې چارې ترسره کېږي چې، ښاري تخلفات ګڼل کېږي.
نوموړي زیاته کړې، د ارګون ولسوالۍ هشترخ تاریخي ساحه د ملي دفاع وزارت اړوند کېږي چې، په داخل کې موجوده هټۍ دوکانونه پهٔ مکمله توګه له منځه وړل شوي او د بیا ځل لپاره په کې سوداګریز فعالیت ترسره کوي چې، په همدې موخه یې په قرارداد هم ورکړې ده.
د دوی د معلوماتو له مخې، یاده ساحه په تفصیلي پلان کې، تاریخي ساحه نومول شوې چې ساتنه یې اړینه ده.
دوی لیکلي، د ارګون ولسوالۍ د ښاروالۍ امریت د یادې موضوع په اړه، څو ځلې د یادې ولسوالۍ د تاسیساتو امریت ته خبر ورکړی، خو پایله یې نه ده ورکړې.
د کور او ښار جوړولو وزارت له ښاري تخلفاتو د مخنیوي ریاست د یادې موضوع په اړه اړوندو ادارو ته خبر ورکړی او تمه ده مخنیوی یې وکړي.
