د پخوانیو ښارونو او تاریخي ابدو د ساتنې لپاره روزنیز سیمنار ترسره شو
۱۴۴۶/۰۳/۲۳
د کور او ښار جوړولو وزارت د ښاري ودې او پراختیا، مسکن او پلانونو ترڅنګ د پخوانیو ښارونو او تاریخي ابدو د ساتنې او خوندیتوب مسؤلیت هم لري.
دغه وزارت د اطلاعات او فرهنګ محترم وزارت، یونسکو او نورو اړوندو مؤسسو او بنستونو سره کار پیل کړی، چې څنګه کېدای شي، افغانستان کې پخواني قدیمي ښارونه او تاریخې ابدې ترمیم، خوندي او په سالمه توګه ترې ګټه پورته شي.
د کور او ښار جوړولو وزارت، له پخوانیو ښارونو او تاریخي ابدو د ساتنې او خوندیتوب ریاست محترم رئیس محمود جان دوست وایي، د قدیمي ښارونو او تاریخي ابدو د ساتنې په موخه یې غزني ولایت ته سفر وکړ او هلته یې نویو ګمارل شوو کار کوونکو ته په یاده برخه کې روزنیز سیمنار ورکړ.
موخه دا ده چې څنګه کېدای شي نوي کار کوونکي له چارو سره بلد او هر ګام په احتیاط پورته کړي.
ښاغلي محمود جان دوست وویل، د متخصصینو لخوا په یاد سیمینار کې بېلا بېل اړوند موضوعات تدریس شول چې په کې د دندې لایحه، د کارکونکو مسؤلیتونه، د تاریخي ابدو د ساتنې څرنګوالی، د تاریخي سیمو د کوردیناتو ثبت او د فرهنګي پلانونو ترتیبول شامل وو.
ښاغلي دوست په دغه سفر کې غزني ولایت کې د ځینو تارخي سیمو څخه لیدنه هم کړې، چې په راتلونکي کې به ورته اړوند او اړین پلانونه ترتیب شي.
