د هېواد په کچه نږدې شپږ سوه پلانونه ترتیب او د تطبیق لپاره وسپارل شول
۱۴۴۷/۴/۱۲
د کور او ښار جوړولو وزارت له لوري د هېواد په کچه (۵۸۷) ښاري پلانونه بشپړ او د تطبیق لپاره د اسلامي امارت د چارو ادارې عمومي ریاست د ښاروالیو چارو د انسجام محترم عمومي ریاست ته وسپارل شول.
دغه مهم اقدام، د کور او ښار جوړولو وزارت محترم وزیر الحاج مولوي نجیب الله حیات حقاني، د ا.ا.ا د چارو ادارې محترم عمومي مشر شیخ نورالحق انور او د ښاروالیو چارو د انسجام عمومي رئیس مولوي محمد اسحق اخندزاده ته د ځانګړې غونډې پر مهال ترسره کړ.
یاد پلانونه، چې د وزارت د متخصصینو له خوا په مسلکي او تخنیکي ډول ترتیب شوي، له مخې به یې منظمه ښاري وده او پراختیا رامنځته شي.
د کور او ښار جوړولو وزارت محترم وزیر الحاج مولوي نجیب الله حیات حقاني، دا ټول (۵۸۷) پلانونه چې د هېواد د ۳۴ ولایتونو لپاره جوړ شوي او د ښاري ودې، منظم انکشاف او د خلکو لپاره د ښاري خدمتونو د پراخېدو لپاره چمتو شوي، مقابل لوري ته تسلیم کړل.
په دغه پلانونو کې، (۵۷) یې عمومي پلانونه، (۱۳۸) یې ستراتېژيک پلانونه او (۳۹۲) یې تفصیلي پلانونه وو، چې عملا په ساحه کې د تطبیق لپاره چمتو او وسپارل شول.
د کور او ښار جوړولو وزارت محترم وزیر الحاج مولوي نجیب الله حیات حقاني وایي، دا چاره یې د عالیقدر امیرالمؤمنین حفظه الله وتعالی د حکم د عملي کېدا او هېوادوالو ته د ابادۍ په چارو کې د اسانتیاوو د رامنځته کولو په موخه ترسره کړه.
د کور او ښار جوړولو وزارت ژمن دی، چې په ټول هېواد کې منظمه ښاري وده او پراختیا رامنځته شي، د سړکونو، پارکونو، رڼا، اوبو رسولو، فاضله اوبو وېستلو او د ټرانسپورټ شبکې ته وده ورکړل شي، خلکو ته به د ښاري ژوند اسانتیاوې برابرې شي، ښارونه به د عصري معیارونو مطابق پراخ شي، د چاپېریال، ودانیو او عامه خدمتونو په برخو کې به اساسي بدلون راشي.
