د هلمند واشېر ولسوالۍ پر عمومي سړک د یوې ودانیزې پروژې له چارو تخنیکي څارنه ترسره شوه
۱۴۴۷/۹/۱۵
هلمند ولایت کې د کور او ښار جوړولو محترم ریاست د تخنیکي او مسلکي ټیم له لوري د دغه ولایت د واشېر ولسوالۍ پر عمومي سړک د ویې ودانیزې پروژې له چارو تخنیکي څارنه او ارزونه ترسره شوه.
دغه څارنه د کور او ښار جوړولو وزارت، له ښاري سرغړونو د مخنیوي او د انکشافي پروژو پر تطبیق د څار محترم عمومي ریاست په همغږۍ او د یاد ولایت د محترمې ښاروالۍ په رسمي غوښتنه ترسره شوه.
دغه پروژه یو باب مسجد شریف دی، چې د ا.ا.ا زعیم عالیقدر امیرالمؤمنین حفظه الله د حکم له مخې، د ټولګټو محترم وزارت له لوري د لویو لارو په اوږدو کې جوړېږي.
د هېواد په کچه د لویو لارو په هر اویا (۷۰) کیلومترۍ کې د دغه جوړېدونکو مسجدونو نقشې د کور او ښار جوړولو وزارت له لوري ډیزاین شوي دي، چې اوسمهال په ساحو کې تطبیق کېږي.
د هلمند واشېر ولسوالۍ پر عمومي سړک دغه جوړېدونکی مسجد شریف په یو وخت کې د درې سوه (۳۰۰) لمونځ کوونکو د ځایولو وړتیا لري، چې د (۱۷۰) تنه نارینه او (۱۳۰) تنه ښځینه لمونځ کوونکو لپاره جلا جلا اسانتیاوې په پام کې نیول شوي دي.
اوس مهال په ساحه کې د ښځینه مسجد د پلستر چارې او همدارنګه د مسجد په ځینو برخو کې د ساده کانکرېټ اچولو کارونه روان دي.
د کور او ښار جوړولو ریاست د تخنیکي ټیم سپارښتنې دا وې چې له پلستر کولو مخکې دې دېوالونو ته په کافي اندازه اوبه ورکړل شي، د پلستر او ساده کانکرېټ درجه دې په دقت مراعت شي، د کاریګرو د خوندیتوب تدابیر دې ونیول شي، د ساحې صفایي او منظم ساتنه دې تأمین شي، ټول کارونه دې د منظور شوې نقشې او بېل احجامو مطابق ترسره شي او د پروژې ټاکل شوی مهالویش دې په پام کې ونیول شي، څو چارې پر خپل وخت بشپړې شي.
