د نوي کابل ښار د ابادۍ برخه کې اړوندو وزارتونو او ادارو د همکارۍ ټټر وډباوه
۱۴۴۷/۵/۲۹
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ د نوي کابل ښار د ابادۍ او پرمختګ برخه کې د اړوندو وزارتونو او ادارو ترمنځ د همغږۍ او همکارۍ غونډه وشوه.
په دغه غونډه کې د کور او ښار جوړولو وزارت مرستیالانو او د نورو (19) اړوندو وزارتونو او ادارو باصلاحیته استازو ونډه اخیستې وه.
د کور او ښار جوړولو وزارت محترم وزیر دوی ته د ښه راغلاست ترڅنګ د نوي کابل ښار په تړاو عمومي معلومات وړاندې کړل او غوښتنه یې وکړه، چې ځینې چارې د نورو وزارتونو او ادارو بشپړې همکارۍ او همغږۍ ته اړتیا لري، چې باید ترسره شي.
د اړوندو وزارتونو او ادارو ترمنځ د یو ګډ مسلکي ټیم رامنځته کول، ترځمکې لاندې د اوبو کچې معلومول، د ځمکو د تصفیې چارې ګړندۍ کول، د برېښنا رسول، د اړوندو یو شمېر ادارو سره د هوکړه لیکونو تازه کول، د واحد او عمومي ډیټابېس جوړول، او داسې نور مهم موضوعات هغه موارد وو، چې په دغه غونډه کې یې یادونه او توافق وشو.
د ټولو اړوندو وزارتونو او ادارو راغلو با صلاحیته استازو د خپلو وزارتونو او ادارو اړوند برخو کې د همغږۍ او همکارۍ ټټر و ډباوه او په شریک یې دغه کار ته د هو سر وخوځاوه.
محترم وزیر الحاج مولوي نجیب الله حیات حقاني وویل، د همکارۍ کولو برخه کې ستاسې ډاډ موږ ته حوصله راکوي چې چارې لا ګړندۍ او هوډ پیاوړی کړو.
نوموړي وویل، د نوي کابل ښار په ابادۍ او پرمختګ سره به پانګوالو ته د پانګونې زمینه او خلکو ته د کار کولو زمینه برابره شي.
د کور او ښار جوړولو وزارت هڅې پیل کړي، چې څنګه کېدای شي د نوي کابل ښار ستره ملي پروژه د بریا ترکچې ورسوي او هېوادوالو ته د منظم او هوسا ښاري ژوند زمینه برابره کړي.
