د مسکن جوړولو برخه کې د بهرنۍ پانګې د جلب او جذب په موخه له چینایي پانګوالو سره ناسته وشوه
۱۴۴۶/۱۱/۱۲
د کور او ښار جوړولو وزارت د مسکن، ودانیزو چارو او د برنامو د پراختیا محترم مرستیال الحاج محمد اسماعیل فائز ، په افغانستان کې د مسکن برخې د کمښت ستونزې حل لپاره خپلې هڅې ګړندۍ کړي دي.
ښاغلي محمد اسماعیل فائز په همدې موخه له چنایي پانګوالو سره وکتل او په افغانستان کې د مسکن برخه کې د پانګونې په چارو او ګټو یې خبرې وکړې.
تر مقدماتي خبرو وروسته تصمیم ونیول شو، چې پانګوال به ځینې سیمې له نږدې وګوري او د راتلونکو اقداماتو لپاره به تابیا ونیسي.
نوموړي د کور او ښار جوړولو وزارت اړوندو ریاستونو ته لارښوونه وکړه، تر څو پانګوال د پام وړ ساحو ته ورولي، چې له نږدې یې وګوري.
د همدغه هدایت پر اساس د دې وزارت د تخنیکي او مسلکي انجنیرانو لخوا چینایي پانګوالو ته په کابل کې هغه سیمې وښودل شوې، چې د مسکن جوړولو لپاره په پام کې نیول شوي دي.
د کور او ښار جوړولو وزارت د پانګونې د جلب او جذب ریاست محترم چارسمبالی ارشاد عمر وایي، د پام وړ سیمې چینایي پانګوالو ته د ماسټر پلان مطابق تشریح شوې او دغه راز یې له پانګوالو سره کانسپټ نوټونه او زونینګ پلانونه شریک کړي دي.
نوموړي وویل، کابل کې یې ځینې هغه ساحې پانګوالو ته ور په ګوته کړې چې د مسکن جوړولو او خلکو ته د سرپناه برابرولو لپاره مناسب موقعیت لري او د تخنیکي او اقتصادي ارزونو پر اساس د پانګونې لپاره مناسبې دي.
د معلوماتو له مخې، چینایي پانګوالو ساحې ولیدې، لېوالتیا یې وښوده او په خبره یې د خپلو ارزونو وروسته به د راتلونکو کړنو لپاره لاس په کار شي.
