د محمد علي کلې بنسټ له خوا د جوړېدونکي سټډیوم د ځمکې په اړه خبرې وشوې
۱۴۴۶/۶/۲
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې له امریکا راغلي ښاغلي ایرونټ منیګو او د هغه له مل ملګري سره وکتل او پر یو شمېر اړینو موضوعاتو یې خبرې وکړې.
په دغه کتنه کې، لومړی په کابل کې د محمد علي کلې د بنسټ له لوري د جوړېدونکي ورزشي سټډیوم د ځمکې د برخلیک په تړاو خبرې وشوې، چې څنګه کېدای شي چارې یې ژر تر ژره پیل شي.
ښاغلي ایرونټ منیګو وویل، هڅه به وکړي چې د افغانستان او امریکا ترمنځ د سیاسي او دیپلوماتیکو اړیکو د رغښت لپاره کار وکړي او په خبره یې کابل کې د ورزشي سټډیوم جوړول یې یو نېک ګام دی.
نوموړی وایي، دا چاره کولای شي چې د نورو سیاسي او دیپلوماتیکو اړیکو د رغښت او پیاوړتیا لپاره لاره پرانیزي او دوی به هڅه وکړي چې مثبت پیغام وړاندې کړي.
منېګو وویل، کله چې بېرته امریکا ته لاړ شي، له افغانستان به ښه انځور وړاندې کړي او په وینا یې تمه لري چې شته موانع به له منځه لاړ شي.
هغه وویل، هڅه به وکړي چې امریکایي پانګوال په افغانستان کې پانګونې ته هم وهڅوي.
د کور او ښار جوړولو وزارت محترم سرپرست وزیر الحاج شیخ حمدالله نعماني وویل، د افغانستان او امریکا ترمنځ شاوخوا شل کاله جګړه وشوه، چې دواړه لورو ته درانه تلفات واوښتل او له امله یې یو د بل پر وړاندې فکرونه حساس شوي چې اړتیا ده دغه اړخ بېرته په سیاسي او دیپلوماتیک لحاظ مثبت او پیاوړی شي.
ښاغلي نعماني وویل، دا چاره سخته نه ده، خو وخت ته اړتیا لري او باید منظم پلان، نرمه او دوستانه پالیسي او پیاوړې سیاسي اراده شتون ولري.
نوموړي وویل، تمه لري چې د امریکا نوی حکومت به د افغانستان پر وړاندې د تېر حکومت ناسمه تګلاره غوره نه کړي او هڅه به وکړي چې د چین او روسیې په څېر دوستانه سیاست خپل کړي.
