د لوګر او میدان وردګو ولایتونو د اقتصادي زونونو له وضعیت لیدنه وشوه
۱۴۴۶/۴/۲۴
د کور او ښار جوړولووزارت د صنعتي او اقتصادي زونونو د برنامو د پراختیا محترم رئیس حاجي محمد مسعود وایي، د لوګر او میدان وردګ ولایتونو د اقتصادي او صنعتي زونونو څخه یې لیدنه وکړه.
ښاغلي محمد مسعود وویل، په دغه سفر او لیدنه کې ورسره د ریاست اړوند نور تخنیکي او مسلکي ملګري هم شامل وو، چې په لوګر ولایت کې یې د صنعتي پارکونو او په میدان وردګ ولایت کې یې د لوژستیک د پارک او د عبدالوکیل د باغ له انسټیټوټ څخه لیدنه وکړه.
د نوموړي په خبره، په یادو سیمو کې یې د شته امکاناتو او د پانګونې لپاره د فرصتونو د برابرولو په موخه ارزونه وکړه، تر څو پانګوالو ته لا زیات امکانات او فرصتونه برابر کړي.
هغه وایي، د دې سره به د سیمې اوسیدونکو لپاره هم کاري زمینې او اسانتیاوې برابرې شي او بازارونو ته به د اړتیا وړ توکي په اسانۍ او کم لګښت ورسېږي.
د لېږد رالېږد شبکه، برېښنا، اوبه، اړیکې، د مالیاتو معافیت یا کمښت، سیمه ییز، ملي او نړیوالو بازارونو ته لاسرسی، له پروژو ملاتړ، د سیمې اوسېدونکو لپاره د کار زمینې برابرېدل، نوښت، مسلکیتوب او له مهارتونو ګته پورته کول، هغه څه دي چې د یادو زونونو په اسانتیاوو او امتیازاتو کې حسابېږي.
د کور او ښار جوړولو وزارت تل په دې هڅه کې دی، چې څنګه کېدای شي د هېواد په کچه معیاري اقتصادي او صنعتي زونونو رامنځته شي او د یو پر ځان بسیا افغانستان لپاره زمینه برابره شي.
