د لغمان په قرغیو ولسوالۍ کې د یوې ودانیزې پروژې له چارو څارنه وشوه
۱۴۴۷/۹/۹
لغمان ولایت کې د کور او ښار جوړولو محترم ریاست اړوند فني او مسلکي ټیم له لوري، د دغه ولایت د قرغیو ولسوالۍ د ښاروالۍ اړوند د سُرخکانو د تعمیر پروژې تخنیکي ارزونه ترسره شوه.
یاد تخنیکي پلاوي د پروژې د پرمختګ، کیفیت او تخنیکي معیارونو د ارزونې په موخه د رغنیزو چارو له نږدې څارنه وکړه.
د لیدنې پر مهال د ودانۍ د یوې برخې د رینګ بیم کانکرېټ اچولو بهیر جریان درلود، چې د چارو د لا ښه والي او معیاري تطبیق په موخه د قراردادي شرکت مسؤل انجنیر ته لازمې تخنیکي سپارښتنې وشوې.
اړوند مسؤلینو ته سپارښتنې وشوې، چې باید کانکرېټ اچول د منظور شوي مارک او تخنیکي ځانګړتیاوو مطابق ترسره شي، د کانکرېټ اچولو په مهال دې د وایبریټر کارونه په منظم او معیاري ډول ترسره شي او د کانکرېټو د سلمپ (اوبو اندازه او مخلوط تناسب) بهیر ته دې بشپړه پاملرنه وشي.
دغه راز سپار ښتنې وشوې، چې د رینګ بیم د لیول ساتنې ته دې جدي پاملرنه وشي، څو کار بې لیوله او بې شاوله پاتې نه شي، د رینګ بیم لاندې او جانبي برخو کې دې کاور د تخنیکي مشخصاتو سره سم په پام کې ونیول شي او د کانکرېټو د پورتنۍ برخې هوارۍ ته دې لازم اهمیت ورکړل شي.
له کانکرېټ اچولو وروسته په معیاري ډول د اوبو ورکولو پروسه او دا چې باید ټولې رغنیزې چارې د منظور شوې نقشې او تثبیت شوو احجامو مطابق ترسره شي، نور هغه موارد وو، چې ټینګار پرې وشو.
د کور او ښار جوړولو وزارت ټینګار کوي، چې د پروژو کیفیتي کنټرول او دوامداره تخنیکي څارنه د معیاري ودانیزو چارو د تضمین بنسټیز اصل دی، او هېڅ ډول تخنیکي سرغړونه به د منلو وړ نه وي.
