د قطر استوګنیز ښارګوټی، اړمنو کسانو لپاره د کور برابرولو یو بل مهم ګام
قطر استوګنیز ښارګوټي د رغولو قرار داد د الغرافې خیریه موسسې او ساختماني شرکتونو ترمنځ د ښارجوړولو او ځمکو وزارت د مشرتابه په حضور د یو لړ مراسمو په ترڅ کې په کابل سرینا هوټل کې لاسلیک شو.
ياد ښارګوټی چې په کابل ښار کې یو له مهمو ښارګوټو څخه شمیرل کیږي، د الغرافې خیریه موسسې د شاوخوا ۱۱۰ میلیون امریکایي ډالرو په مالي مرسته جوړیږي.
د غونډې په ترڅ کې د الغرافې خیریه موسسې اجراییوي رئیس محترم شاهد جواد الله رخا د ځمکې د انتقال او د ښارګوټي تفصیلي پلانون د جوړولو په برخه کې د ښار جوړولو او ځمکو وزارت له بېدریغه همکارۍ مننه وکړه او د یادې پروژې د ښه تطبیق په پار ژمنه وکړه.
ورپسې، د ښار جوړولو او ځمکو وزیر محترم محمود کرزی د قطر استوګنیز ښارګوټي جوړېدل یې د جمهور رئیس له ژمنو څخه یاد کړ او د دې مهمې پروژې د تطبیق په برخه کې د هر ډول همکارۍ ډاډ ورکړ.
همدارنګه، د ښارجوړولو او ځمکو وزیر د الغرافې خیریه موسسې له مسوولین وغوښتل د لیوالتیا په صورت کې دا وزارت چمتو ده چې د هېواد په هره سیمه کې د پانګونې په موخه دولتي ځمکه د دوی په واک کې ورکړي.
په همدې ترتیب، د اقتصاد او ارشاد، حج او اوقافو وزیرانو د الغرافې خیریه موسسې له دې اقدام څخه مننه وکړه او د دې پروژې د اقتصادي ارزښت په اړه د خبرو ترڅنګ، د ښار جوړولو او ځمکو وزارت نقش یې د قطر استوګنیز ښارګوټي د احداث په برخه کې مهم وباله.
په پای کې، د ښار جوړولو او ځمکو وزارت د مسکن چارو تنظیم مرستیال ښاغلی عزیز احمد ګلستاني د قطر استوګنیز ښارګوټي د جوړولو په اړه بشپړ معلومات وړاندې کړل او د دې پروژې پلي کېدل یې د دولتي ځمکو څخه د سمې استفادې یو ښه بیلګه وباله.
قطر استوګنیز ښارګوټی په ۳۲ جریبه ځمکه د کابل ښار په پنځمه ناحیه کې جوړیږي. د تفصیلي پلان پر اساس، په دې ښارګوټي کې اته ۱۲ پوړیزه استوګنیز بلاکونه، درې ۷ پوړیزه تجارتي بلاکونه، یو جومات، دو ښوونځي، یو دارالایتام او دوه ۵ پوړیزه تجارتي مرکزونه په پام کې نیول شوي چې په تطبیق سره به یې اړمنو کسانو ته د ښې استوګنې زمینه برابره شي.
