د فارياب ولايت د قرمقل ولسوالۍ اداري کمپلکس ورغول شو
ښار جوړولو او ځمکو وزارت د ثبات تحکيم ملي برنامې له لارې د فارياب ولايت د قرمقل ولسوالۍ اداري کمپلکس ودانۍ د جوړولو چارې بشپړې کړې او ګټې اخېستنې ته يې وسپارله.
دا ودانۍ په ۴۹۰ متر مربع ځمکه کې په درې پوړيز ډول چې ۱۷ کاري خونې، د غونډو يو تالار، يو پخلنځای، ۹ تشنابونه او يو ګودام لري، د دولت له پراختيايي بوديجې څخه په ۲۵ ميلیونه ۹۲۹ زره افغانيو ورغول شوه.
ښار جوړولو او ځمکو وزارت د بېلابېلو ولايتونو په مرکزونو او ولسواليو کې تر اوسه ۱۲۹ اداري ودانۍ رغولي او هلته د موجودو کارکوونکو لپاره يې د کار مناسب او ارام چاپېريال زمينه برابره کړې ده.
