د غزني د شهیدانو او معلولینو ښارګوټي تفصیلي پلان د کور او ښار جوړولو وزیر له لوري لاسلیک شو
۱۴۴۸/۳/۳
د غزني ولایت د مرکز اړوند د شهیدانو او معلولینو ښارګوټي تفصیلي پلان د کور او ښار جوړولو وزارت د محترم وزیر الحاج مولوي نجیبالله حیات حقاني له لوري لاسلیک شو.
دغه ښارګوټی د غزني ښار په مرکز کې پر ۵۰۰ جریبه ځمکه د استوګنې، ښاري پراختیا او د شهیدانو او معلولینو کورنیو لپاره د مناسب او معیاري استوګنیز چاپېریال د برابرولو په موخه طرحه شوی دی.
د تفصیلي پلان له مخې، په ښارګوټي کې د استوګنیزو ساحو ترڅنګ د سړکونو، پلې لارو، شنو ساحو، پارکونو، ښوونیزو او روغتیايي مرکزونو، سوداګریزو او خدماتي مرکزونو، د اوبو رسولو، برېښنا او فاضلاب شبکو او نورو اړینو عامه تأسیساتو لپاره هم ځایونه په پام کې نیول شوي دي.
د پلان له مخې، د ښارګوټي د استوګنیزې ساحې لپاره شاوخوا ۱۵۱ جریبه ځمکه ځانګړې شوې چې د ټولې ساحې نږدې ۳۱ سلنه جوړوي. په دې برخه کې ټولټال ۷۶۸ استوګنیزې نمرې په پام کې نیول شوې دي چې په بېلابېلو اندازو او ډولونو وېشل شوې دي.
د ښارګوټي په تفصیلي پلان کې د شنو ساحو او خدماتي تأسیساتو لپاره هم مناسبه ساحه ځانګړې شوې، څو د استوګنې ترڅنګ د اوسېدونکو لپاره سالم، منظم او د ښاري معیارونو مطابق چاپېریال رامنځته شي.
همدارنګه، د ښارګوټي په طرحه کې د سوداګریزو فعالیتونو لپاره شاوخوا ۴۳،۸۶ جریبه ځمکه ځانګړې شوې ده. په دې برخه کې د سوداګریزو بلاکونو لپاره منظم پلان جوړ شوی او د ودانیو د ارتفاع، هواخورۍ، رڼا او د موټرود تم ځای اړوند معیارونه په پام کې نیول شوي دي.
د یاد ښارګوټي د تفصیلي پلان په طرحه کې هڅه شوې چې د استوګنې، سوداګرۍ، عامه خدمتونو، شنو ساحو او ترانسپورتي شبکې ترمنځ مناسب توازن رامنځته شي، څو د ښارګوټي اوسېدونکو ته د ژوند، تګراتګ او اړینو خدماتو لپاره مناسبې اسانتیاوې برابرې شي.
د دغه ښارګوټي د تفصیلي پلان پلي کول به د غزني ښار د منظمې پراختیا، د استوګنې د اړتیاوو د تنظیم او د شهیدانو او معلولینو لپاره د معیاري استوګنیز چاپېریال د رامنځته کولو په برخه کې مهم ګام وي.
