د عرفاني سړک او د کابل سيند حريم زيانمنو او د شهر دوبۍ هوټل د شهيدانو وارثينو په وړاندې د حکومت ژمنه سر ته ورسېده
د ښار جوړولو او ځمکو وزارت سرپرست محترم محمد جواد پيکار د کابل له والي محترم محمد يعقوب حيدري او د کابل ښاروال محترم احمد ذکي سرفراز په ګډون له يو شمېر رئيسانو او کارکوونکو سره يو ځای د سردار محمد داوود خان په ښارګوټي کې د عرفاني سړک او د کابل سيند زيانمنو او د شهر دوبۍ هوټل د شهيدانو وارثينو ته د استوګنيزو نمرو وېش پيل کړ.
د ښار جوړولو او ځمکو وزارت سرپرست له خپل ملګري پلاوي سره يو ځای د شهيد سردار محمد داوود خان له ښارګوټي ليدنه وکړه او بيا يې د کابل والي او ښاروال په شتون کې د نمرو د خط اندازۍ پرانېسته وکړه.
محترم محمد جواد پيکار وويل، د کابل ښار د شهر دوبۍ پېښې د شهيدانو وارثينو او د عرفاني سړک او کابل سيند زيانمنو ته يې د افغانستان اسلامي جمهوري رياست عالي مقام په لارښوونه د استوګنيزو نمرو دا وېش پيل کړی او ټاکل شوې چې هر زيانمن ته دوه بسوې ځمکه په سردار محمد داوود خان ښارګوټي کې ورکړل شي.
د ښار جوړولو او ځمکو وزارت سرپرست د نمرو د وېش په پروسه کې پر شفافيت او د دې پروسې د تطبيق لپاره د يوې روښانه کړنلارې پر جوړېدو ټينګار وکړ.
د شهيد سردار محمد داوود خان ښارګوټی چې ۲۴۰ جريبه ځمکه يې نيولې د کابل ښار د کوه قروغ سيمې اړوند په شادمان قريه کې موقعيت لري. په دې ښارګوټي کې ۸۸ جريبه ځمکه د استوګنې لپاره او نوره يې د تفريحي پارکونو او خدماتي سيمو لپاره ځانګړې شوې ده.
ټاکل شوې د دې ښارګوټي له ۴۷۷ نمرو څخه ۲۵۰ يې د عرفاني سړک زيانمنو ته، ۱۰۰ نمرې د شهر دوبۍ هوټل د شهيدانو وارثينو ته او ۱۲۷ نمرې د کابل سيند د حريم زيانمنو ته وويشل شي.
د دې ښارګوټي تفصيلي پلان د ښار جوړولو او ځمکو وزارت لهخوا ترتيب شوی او ټاکل شوې چې د زيربناسازۍ چارې يې د ښاروالۍ لهخوا ترسره شي.
