د عامې روغتیا وزارت لپاره د نقشو پر ویزه کولو خبرې وشوې
۱۴۴۶/۱۱/۱۴
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې د عامې روغتیا وزارت محترم تدارکاتي مشاور سید عمران سادات او مل هیئت سره وکتل.
په دغه کتنه کې چې د کور او ښار جوړولو وزارت د مسکن، ودانیزو چارو او د برنامو د پراختیا محترم مرستیال الحاج محمد اسماعیل فائز او د نورو اړوندو ریاستونو مسؤلینو هم شتون درلود، د عامې روغتیا وزارت اړوند د (318) عمومي روغتونونو د نقشو په اړه خبرې وشوې.
د عامې روغتیا محترم وزارت غوښتنه کړې، چې د یادو روغتونونو لپاره جوړې شوې نقشې دې د کور او ښار جوړولو وزارت وکړي او نورې چارې به یې دوی خپله پرمخ یوسي.
په ناسته کې، تر هر اړخیزو خبرو او دلایلو وروسته تصمیم ونیول شو، چې د کور او ښار جوړولو وزارت به نقشې ویزه کړي او د عامې روغتیا محترم وزارت ته به د خاورو د ټسټ لپاره مکتوب ورکړي، تر څو په اړه اقدامات وکړي.
د کور او ښار جوړولو وزارت تخنیکي او مسلکي ټیمونه وایي، د نقشو د تطبیق برخه کې د خاورو ټسټ او ارزونه مهمه خبره ده چې باید ترسره شي.
د عامې روغتیا وزارت محترم تدارکاتي مشاور سید عمران سادات وویل، د کور او ښار جوړولو وزارت دې د نقشو په ویزه کولو کار پیل کړي او دوی به د خاورې د ټسټ او ارزونې مکتوب راوړي او دغه مسؤلیت به په خپله غاړه واخلي.
د کور او ښار جوړولو وزارت هڅه کوي چې د هر ډول ودانیو نقشې په معیاري توګه تطبیق شي او په راتلونکي کې د خطرونو احتمال ونه لري.
