د سرپل – بلخاب ترمنځ د سړک لومړنۍ سروې ترسره شوه
۱۴۴۵/۱۲/۲۳
سرپل کې د کور او ښار جوړولو ریاست محترم رئیس مولوي محمد نور نوراني وایي، د ریاست اړوند انجنیرانو یې له سرپل تر بلخاب د سړک جوړولو په موخه لومړنۍ سروې پیل کړه.
ښاغلی مولوي محمد نور نوراني وایي، یاده چاره د دغه ولایت د محترم مقام په حکم پیل شوه چې ډېر ژر به یې ورپسې چارې پیل شي.
اړوند انجنیران وایي، د کانونو تر کتنې او له ولسوالیو د لازمه معلوماتو ترلاسه کولو وروسته یې سروې پیل کړه او تر شترګردن پورې به دوام ورکوي.
د دوی په خبر، د لارې په اوږدو کې یې ټولې لوړې او ژورې، ګولایي ګانې او د موټرو د تګ راتګ لپاره یې د لید ساحې په نښه او مناسبې شعاع تعین کړي او ځینې برخې یې د (جي، پي، ایس) دستګاه پر مټ ثبت کړي دي.
د کور او ښار جوړولو وزارت د پراختیایي چارو، ودانیزو او رغنیزو کارونو او نورو ټولګټو چارو لپاره لومړنۍ سروې او براورد کوي او د عملي کولو لپاره یې اړوندو ادارو ته سپاري.
