د سرپل ولایت د پوهنتون سیمې سروې د تفصیلي پلان د طرحې په موخه روانه ده
۱۴۴۶/۱۲/۴
سرپل ولایت کې د کور او ښار جوړولو ریاست محترم رئیس ملا محمد نور نوراني وايي، د ریاست اړوند تخنیکي ټیم یې د دغه ولایت د پوهنتون د سیمې سروې د تفصیلي پلان د جوړولو په موخه پیل کړه.
ښاغلی ملا نوراني وایي، د دې سروې اصلي هدف د سیمې حدود او فزیکي ځانګړتیاوې تثبیتول، د موجوده شرایطو پېژندنه، د خاورې نوعیت، توپوګرافي، د سړکونو شبکه، موجوده ودانۍ او نور عوامل دي، چې د تفصیلي پلان په طرحه کې مهم رول لري.
نوموړی وایي، د پوهنتون د سیمې لومړني حدود د (جي، پي، ایس) او توپوګرافیکي وسایلو په مرسته تثبیتېږي، د خاورې د سطحې ابتدایي ارزونه، د نباتاتو پوښښ، او ابتدایي نقشې جوړول د ټوتل سټېشن په وسیله ترسره کېږي.
دغه راز، دوی د پوهنتون له مسؤلینو سره مرکې کوي چې نور معلومات او د پراختیا اړتیاوې معلومې شي.
سربېره پردې، د عامه سړک، بیخ بنایي جوړښتونو(برق، اوبه، فاضلاب) او د احتمالي راتلونکو لارو ارزونه هم روانه ده.
ملا نوراني وایي، د سرپل ولایت د پوهنتون سیمې سروې په تخنیکي او مسلکي ډول ترسره کېږي، او کله چې پاتې پړاونه بشپړ شي، د تفصیلي پلان د طرحې پروسه به پیل شي.
