د روښانه سبا او منظم ښاري جوړښت پر لور یو بل ګام؛ د نوي کابل ښار لومړي فاز اړوند د یو بل پراختیا ورکوونکي شرکت تفصیلي پلان منظور شو
۱۴۴۷/۰۸/۰۳
په نوي کابل ښار کې د ابادۍ چارو پرمختګ او چټکتیا په موخه یو بل رغنده ګام پورته شو، چې پانګوالو ته د هیلو عملي کولو دروازه پرانستل شوه.
د کور او ښار جوړولو وزارت محترم وزیر الحاج مولوي نجیب الله حیات حقاني، د نوي کابل ښار لومړي فاز اړوند د (اوکسین اریانا) پراختیا ورکوونکي شرکت اړوند تفصیلي پلان لاسلیک او منظور کړ.
محترم وزیر حقاني، هیله لري چې د ویزه شوي پلان له مخې به یاد شرکت خپلې د ابادۍ چارې پرمخ یوسي او د یوې منظمې ښاري پراختیا لپاره به لاره هواره شي.
دغه پلان، له هر اړخیزو تخنیکي او مسلکي ارزونو وروسته منظور شو او په عملي ډول ورته د کار پیلولو رسمي اجازه هم ورکړل شوه.
د کور او ښار جوړولو وزارت محترم وزیر الحاج مولوي نجیب الله حیات حقاني، ټینګار کوي، چې پراختیا ورکوونکي شرکتونه دې د کاري جواز ترلاسه کولو سره سم په عملي کارونو پیل وکړي.
نوموړی باور لري چې دغه چاره به د نورې پانګونې او خلکو ته د کار پیدا کولو په برخه کې مهم او اغېزمن رول ولوبوي.
پر دې سربېره به د منظم ښاري جوړښت لپاره عملي کارونه وشي، د غیر پلاني ودې او پارختیا مخنیوی به وشي او ښاري اسانتیاوې به رامنځته شي.
له پراختیا ورکوونکو شرکتونو څخه ژمنه اخیستل شوې چې ټولې چارې به د ښاري پلان، ساختماني معیارونو او چاپېریالي اصولو ته په بشپړې پاملرنې سره مخته وړي، تر څو یو منظم، خوندي او د اوسېدو وړ ښاري چاپېریال رامنځته شي.
