د جوزجان ولایت د کور او ښار جوړولو ریاست د ښاري او ساختماني سرغړونو ارزونه وکړه
۱۴۴۷/۰۲/۰۶
د جوزجان ولایت د کور او ښار جوړولو ریاست محترم رئیس ملا عبدالله فیضان وایي، د دې ریاست اړوند تخنیکي ټيم د اړوندو ادارو په ملتیا د (i) پروژې د تفصیلي پلان له مخې څارنه او ارزونه ترسره کړه.
ښاغلي ملا فیضان وویل، د څارنې پر مهال چې د مقام ولایت جوزجان، امنیه قوماندانۍ، شاروالۍ، د ټولګټو ریاست او د اوبو او انرژۍ ریاست استازي یې هم برخه وال وو، څرګنده شوه چې د(i) پروژې په ځینو سیمو کې د تفصیلي پلان پر خلاف، د شنو ساحو په ځینو برخو کې د استوګنې نمرې ودانې شوې دي چې دا کار د ښاري اصولو او مقرراتو ښکاره سرغړونه ده.
د نوموړي په خبره، مسؤولینو د دغې سرغړونې د مخنیوي لپاره اړوند ساحې هر اړخیزې وڅېړلې او په هغو ځایونو کې چې نورې سرغړونې موجودې وې، کارونه یې درولي دي، همداراز د مسؤلینو څخه غوښتل شوي چې خپل قانوني اسناد د څارنې ټیم ته وړاندې کړي او ټول کارونه د پلان شوې نقشې سره سم له سره پیل کړي.
