د تالقان ښار سټراټيژیک پلان منظور شو
د ښار جوړولو او ځمکو وزیر محترم محمود کرزي په ولسي جرګه کې د تخار استازیو محترمې حبیبه دانش، محترم عبدالباقي ملکزاده، محترمې نظیفه یوسفي بیک، محترم محمد عالم ساعي او محترم انجنیر امیر محمد خاکسار او د دې وزارت د ځینو رئیسانو او مسوولانو په حضور کې د تالقانو ښار سټراټیژیک پلان منظور کړ.
دا سټراټیژیک پلان د تالقانو ښار پراختیا مسیر معلومولو تر څنګ په تخار ولایت کې د ښاري پراختیا پروژو پلي کېدو ته زمینه برابروي.
په دې پلان کې ۱۸ هکټاره ځمکه د ورزشي سیمو، ۷ هکټاره ځمکه د فرهنګي سیمو، ۱۱ هکټاره ځمکه د روغتیايي سیمو، ۲۵ هکټاره ځمکه د پارک او زرغونو سیمو، ۶۰ هکټاره ځمکه د عامه تاسیساتو، ۲۷ هکټاره ځمکه د زدهکړې سیمو، ۲۰ هکټاره ځمکه د تفریحي سیمو، ۵۷ هکټاره ځمکه د صنعتي سیمو، ۲۴ هکټاره ځمکه د اداري سیمو او نږدې ۱۰ هکټاره ځمکه د ټرانسپورټي فعالیتونو د سمبالښت په موخه په نظر کې نیول شوې ده.
د یادولو وړ ده چې د ښار جوړولو ځمکو وزارت له لوري په تېرو شپږو میاشتو کې ۲۵ پراختیا پلانونه د کابل، ننګرهار، لوګر، فراه، غور، جوزجان، بامیان، کاپیسا، خوست، بغلان، ارزگان، نیمروز، فاریاب، سرپل، سمنګان او پروان ولایتونو لپاره منظور شوي دي. په دې پلانونو کې ۷ تفصیلي، ۱۱ سټراټیژيک، ۲ منطقوي او ۵ د بهسازۍ پلانونه شامل وو چې په پلي کېدو سره به یې ۲۰ زره کورنیو ته د اوسېدو ځایونه پیدا شي، ښارونه به په منظم ډول انکشاف وکړي، غیر پلاني سیمې به جوړې شي او په ۱۶ ولایتونو کې به پرمختیايي او ټولګټو پروژو ته د پلي کېدو زمینه برابره شي.
