د بغلان ولایت د پلخمري ښار پراختیايي ستراتیژیک پلان لاسلیک شو
۱۴۴۷/۰۵/۲۹
د کور او ښار جوړولو وزارت محترم وزیر الحاج مولوي نجیبالله حیات حقاني، ، د بغلان ولایت د پلخمري ښارپراختیایي ستراتیژیک پلان لاسلیک کړ.
محترم وزیر الحاج مولوي حقاني د پلان د لاسلیک پر مهال وویل چې پلخمري د هېواد له مهمو ښارونو څخه دی او منظم انکشاف یې د کور او ښار جوړولو وزارت له اساسي اړتیاوو څخه ګڼل کېږي، هغه زیاته کړه موږ غواړو چې ټول ښارونه د واضح پلان او منظمې نقشې له مخې پرمخ ولاړ شي.
د پلخمري ښار د پراختیایي ستراتیژیک پلان چې د دې وزارت د ملي جامع پلان ریاست له لوري طرحه او ترتیب شوی، د اوږدمهاله پرمختګ لپاره مهمه نقشه او رهنمود دی چې د ځمکې کارونې برخې لکه د استوګنې ساحې، سوداګریزې سیمې، اداري ودانۍ، دولتي تأسیسات، شنې سیمې، بنسټیزې زېربناوې او د ښاري ودې مسیر په دقیقه توګه پکې مشخص شوی دی.
د ورکړل شوو معلوماتو په اساس، په دغه پلان کې د ښار د انکشافي وړتیا کچه، د متوازنې ودې لپاره د سیسټم جوړول، اقتصادي پرمختګ او د ښاري پراختیا د مهمو مرکزونو پېژندنه او ټاکنه مشخصه شوې ده، همدارنګه د پلخمري ښار د کډوالو ښارګوټي هم د ښاري ودې په محدوده کې شامل ګڼل شوي دي.
د کور او ښار جوړولو وزارت ښاري پلانونه د معیاري اصولو پر اساس ترتیبوي، او دغه نقشې د ښار د منظم او قانونمند انکشاف بهیر په دقیقه توګه ترسیموي.
