د انجنیري طرحو او لېنډسکېپ ریاست د فعالیتونو د ارزونې غونډه ترسره شوه
۲۴۴۷/۰۲/۲۳
د کور او ښار جوړولو وزارت د مسکن، ودانیزو چارو او برنامو د پراختیا د محترم معین مولوي ګل زرین صابر، په مشرۍ د انجنیري طرحو او لېنډسکېپ ریاست د فعالیتونو د ارزونې غونډه د یاد ریاست د رئیس، آمرینو او کارکوونکو په ګډون ترسره شوه.
په پیل کې محترم معین وویل چې د دغې غونډې موخه د کاري ستونزو او ننګونو ارزونه او د مناسب حل لارو لټون دی.
نوموړي پر دې هم ټینګار وکړ چې د چارو پر چټکتیا او د کارکوونکو ترمنځ د لازمې همغږۍ رامنځته کول اړین دي، څو پروژې او سپارل شوې دندې د ځنډ سره مخ نه شي.
هغه د اداري نظم، اصولو او د قانوني چوکاټ پر مراعتولو بیا ټینګار وکړ او څرګنده یې کړه چې ټول کارونه باید د شریعت، اصولو او نافذه قوانینو په رڼا کې ترسره شي او کارکوونکي د اداري اصولو رعایت ته ژمن پاتې شي.
وروسته، د انجنیري طرحو او لېنډسکېپ ریاست محترم رئیس، انجنیر میروس جمالي، د یاد ریاست د اوسني تشکیلاتو په اړه معلومات وړاندې کړل او د ځینو کارکوونکو د بستونو د لوړولو غوښتنه یې وکړه.
په همدې غونډه کې د ریاست یو شمېر آمرینو د خپلو فعالیتونو تر څنګ، موجودې ستونزې هم د م مسکن، ودانیزو چارو او برنامو دپراختیا له محترم معین سره شریکې کړې.
