د اسلامي نظام د اهمیت او ملاتړ په اړه سیمینارونه ترسره شول
۱۰/۰۸/۱۴۴۷
د کور او ښار جوړلو وزارت د دعوت او ارشاد ریاست، د اسلامي نظام د اهمیت او ملاتړ په اړه د دې وزارت کارکوونکو ته سیمینارونه ترسره کړل.
دا سیمینارونه د کور او ښار جوړولو وزارت د مرکزي کارکوونکو او د ځینو ولایتي ریاستونو د کارکوونکو لپاره د څو ورځو لپاره جوړ شوي وو.
د دې وزارت د دعوت او ارشاد ریاست محترم رئيس وویل، چې د امیرالمؤمنین حفظه الله تعالی د عالي فرمانونو د اخلاص او اطاعت په اړه، او همدارنګه د اسلامي نظام د اهمیت، او د خپل سیرت او صورت د اسلامي شریعت سره برابرولو په اړه په تفصیل خبرې وشوې.
دغه ریاست زیاته کړه، چې د څو ورځو په ترڅ کې د امر بالمعروف او نهی عن المنکر قانون هم تدریس شو او د هغه په اړه ارشادي ویناوې وړاندې شوې.
د کور او ښار جوړولو وزارت د دعوت او ارشاد ریاست په تېرو یو کال کې د عقایدو، احکامو او اخلاقو په برخه کې ۲۱۳ تعلیمي غونډې ترسره کړې دي، چې پکې د طهارت، لمونځ، زکات، روژه، حج، قرباني، نکاح، د جهاد فضیلت، معاملات او نورو موضوعاتو په برخه کې د دې وزارت کارکوونکو ته زده کړې ورکړل شوې دي.
همدارنګه، د معنوي اړخونو، اخلاقو، د تقوا فضیلت، د الله تعالی د بندګانو خدمت، اتحاد، اتفاق، همغږي، د اسلامي نظام مسؤلیتونه او د امراء اطاعت په اړه د پوهاوي لپاره ۴۸ اصلاحی ویناوې هم ترسره شوې دي.
د کور او ښار جوړولو وزارت د دعوت او ارشاد ریاست همدارنګه هره ورځ د جماعت له لمانځه وروسته د اسلامي احکامو، عقایدو، اخلاقو او نېک سلوک په اړه جامع خبرې او بیانونه وړاندې کړي دي.
