د استوګنې په برخه کې د پانګونې پر فرصتونو خبرې وشوې

1447/02/19

د کور او ښار جوړولو وزارت د مسکن، ودانیزو چارو او برنامو د پراختیا معین، محترم مولوي گل‌زرین صابر، د پاکستاني پانګوالې کمپنۍ (اچ ار ال) له مسؤلینو سره د افغانستان په ځانګړې توګه د نوي کابل ښار د استوګنې په پروژو کې د پانګونې په اړه وکتل.

دغه لیدنه د یادې کمپنۍ د لوړپوړو مسؤلینو، د پانګونې د تنظیم ریاست، او د وزارت اړوندو ریاستونو د یو شمېر آمرینو او استازو په ګډون ترسره شوه.

محترم مولوي صابر په خپلو خبرو کې وویل چې اوس په افغانستان کې د پانګونې لپاره مناسب فرصتونه برابر شوي او پانګوال کولی شي په ډاډ سره خپلې پانګوالۍ ته دوام ورکړي.

 نوموړي زیاته کړه چې په هېواد کې سراسري امنیت ټینګ شوی او پانګوال کولای شي په هره هغه سیمه کې چې علاقه ولري، د استوګنې په ګډون، په بېلابېلو برخو کې پانګونه وکړي.

هغه په ځانګړې توګه د نوي کابل ښار د استوګنې پروژو ته په اشارې سره څرګنده کړه چې پانګوال شرکتونه نه یوازې په کابل، بلکې د هېواد په نورو ولایتونو کې هم د استوګنې په پروژو کې پانګونه کولی شي.

د پاکستاني پانګوال شرکت مسؤلینو په دې لیدنه کې د (اچ ار ال) د پخوانیو فعالیتونو او ساختماني تجربو په اړه معلومات وړاندې کړل او خوښي یې څرګنده کړه چې په افغانستان کې د پانګونې لپاره ښه شرایط رامنځته شوي دي او د استوګنې په برخه کې د پانګونې پر لېوالتیا ټینګار وکړ.

همدارنګه د غونډې په دوام کې د یاد شرکت له‌خوا د یو شمېر فعالیتونو، ساختماني ډیزاینونو او د پرمختللو ښارونو طرحې د یوه معلوماتي پریزینټیشن له لارې وړاندې شوې.

 په پای کې پرېکړه وشوه چې په راتلونکو ناستو کې به د پانګونې د څرنګوالي او عملي ګامونو په اړه مفصل بحث وشي.