د ارزګان ولایت په بېلابېلو ناحیو کې د ښاري تخلفاتو د مخنیوي په موخه نظارت ترسره شو
۱۴۴۷/۱۲/۲۲
د ارزګان ولایت د کور او ښار جوړولو ریاست اړوند د ښاري سرغړونو د مخنیوي ټیم د ښار په بېلابېلو ناحیو کې د ښاري تخلفاتو د مخنیوي او د ښاري پلانونو د سم تطبیق په موخه نظارت ترسره کړ.
د یاد نظارت په ترڅ کې یو شمېر ساختماني فعالیتونه او ښاري ساحې وارزول شوې او هغو مواردو ته رسېدنه وشوه چې د ښاري اصولو او منظور شوو پلانونو خلاف پکې د فعالیت احتمال موجود و.
همدارنګه اړوندو اشخاصو ته د نافذه مقرراتو او ښاري پلانونو د رعایت په اړه لازمې سپارښتنې وشوې.
د نظارت پر مهال ښاریانو ته د شنو، استوګنیزو، سوداګریزو او اداري ساحو د کارونې په اړه معلومات هم وړاندې شول او سپارښتنه ورته وشوه چې ټول ودانیز فعالیتونه د کور او ښار جوړولو وزارت د نافذه طرزالعملونو او منظور شوو پلانونو له مخې ترسره کړي.
د ارزګان ولایت د کور او ښار جوړولو ریاست ټینګار کوي چې د ښاري نظم د تأمین، د غیرقانوني ودانیزو فعالیتونو د مخنیوي او د ښاري پلانونو د سم تطبیق په موخه به د نظارت او عامه پوهاوي بهیر دوام ولري.
