جوزجان کې له ګاونډیو هېوادونو راتلونکو مهاجرو ته د ځمکو د وېش بهیر پیل شو
۱۴۴۶/۱۰/۲۶
د ریاسة الوزرا محترم عالي مقام ښاغلي اداري مرستیال مولوي عبدالسلام حنفي او د کور او ښار جوړولو وزارت محترم سرپرست وزیر الحاج شیخ حمدالله نعماني، د جوزجان ولایت په شبرغان ښار کې اجباري راستنېدونکو بې وزله مهاجرو ته د مسکن جوړولو په موخه نمرې ووېشلې.
په تړاو یې جوړ شوو مراسمو کې، د ریاسة الوزرا محترم عالي مقام ښاغلي اداري مرستیال مولوي عبدالسلام حنفي وویل، له بده مرغه چې ګاونډي هېوادونه د ټولو ملي، سیمه ییز او نړیوالو اصولو او قوانینو خلاف له افغان مهاجرو سره ناوړه چلند کوي او په ځینو مواردو کې یې شتمني هم لوټي.
محترم مولوي عبدالسلام حنفي وویل، اسلامي امارت ګام په ګام د پرمختګ په حال کې دی او د خپلو خلکو خدمت کوي.
د کور او ښار جوړولو وزارت محترم سرپرست وزیر الحاج شیخ حمدالله نعماني وویل، مهاجر د دوی ورونه دي او خوښ دي چې د خپلو مهاجرو ورونو خدمت کوي او په کوردننه ورته د دایمي مېشتېدو زمینه برابروي.
ښاغلي شیخ حمدالله نعماني وویل، مهاجرت یوه سپېڅلې اسلامي کلمه ده او دا لړۍ به د ژوند په بېلا بېلو پړاونو کې دوام لري، خو په خبره یې اوس هېواد امن دی، هوسا دی، نو که مهاجر راشي خپل هېواد کې به یې سر، مال او عزت خوندي وي.
محترم نعماني پر مهاجرو غږ وکړ، چې له راغلې خپلواکۍ او سپېڅلي اسلامي نظام خوند واخلئ او خپله انرژي د هېواد په ابادۍ کې ولګوئ.
په مراسمو کې د جوزجان مرستیال والي ښاغلي نورالدین عمیر وویل، مهاجر له سخت وضعیت سره مخامخ دي، خو امارت یې خدمت ته مټې رانغاړلي دي.
ښاغلي عمیر په خلکو هم غږ وکړ چې د خپلو مهاجرو ورونو لاسنیوی وکړي.
نوموړي مهاجرو ته د ښارګوټو په چوکات کې د نمرو وېش، طرحه او ډیزاین د جوزجان ولایت د پرمختګ لپاره ګټور وبلل.
په جوزجان ولایت کې د مهاجرو ښارګوټی په (۲۰۰۰) دوه زره جریبه ځمکه کې جوړ دی، چې (۱۵۹۸) نمرې لري، څلور مساجد، لس سوداګریزې ساحې، درې مدرسې، هدیره، ښوونځي د تفریح ساحه او داسې نور.
