تیره ورځ سه شنبه په راستنوشوو مهاجرینو باندې (۱۳۰۹) استوګنیزې نمرې وویشل شوې
۱۴۴۷/۱۱/۲۶
د کور او ښار جوړولو وزارت په مشرۍ د دایمي مېشتېدنې او د ځمکو د وېش کمېټې، د هېواد په بېلابېلو ولایتونو کې راستنو شویو مهاجرو کورنیو ته استوګنیزې نمرې ووېشلې.
د کور او ښار جوړولو وزارت محترم وزیر الحاج مولوي نجیب الله حیات حقاني تل په خپلو خبرو کې ټینګار کړی، چې اسلامي امارت د راستنېدونکو مهاجرو د ستونزو حل، د هغوی د اساسي اړتیاوو پوره کول او د دایمي اسکان برابرول خپل مهم مسؤلیت ګڼي.
دغه نمرې د سه شنبې ورځې په جریان کې هغو سلګونو کورنیو ته ووېشل شوې، چې په دې وروستیو کې له ګاونډیو هېوادونو هېواد ته راستنې شوې دي، څو د هغوی لپاره د دایمي استوګنې زمینه برابره شي.
د دغې پروسې په ترڅ کې، په ننګرهار ولایت کې ۲۸۶، پکتیکا کې ۴۰، زابل کې ۲۰۰، پکتیا کې ۲۶، لوګر کې ۱۶۵، کندز کې ۱۶۲، غزني کې ۸۰، فراه کې ۳۰۰ او هلمند ولایت کې ۵۰ راستنېدونکو مهاجرو کورنیو ته د استوګنیزو ځمکو نمرې وسپارل شوې.
په ټوله کې، د سه شنبې ورځې په جریان کې (۱۳۰۹) استوګنیزې نمرې ووېشل شوې، چې ورسره د هېواد په کچه د وېشل شوو نومرو مجموعي شمېر ۲۴ زره او ۱۶۰ ته ورسېد.
د کور او ښار جوړولو وزارت ټینګار کوي، چې د راستنېدونکو مهاجرو د دایمي مېشتېدنې، د ژوند د بنسټیزو اسانتیاوو برابرولو او د استوګنیزو ښارګوټو د پراختیا لړۍ به په چټکۍ او دوامدار ډول روانه وي.
