بلخ ولایت کې اجباري راستنېدونکو کډوالو ته د نمرو وېش پیل شو
۱۴۴۶/۱۰/۲۵
د ریاسة الوزرا محترم عالي مقام ښاغلي اداري مرستیال مولوي عبدالسلام حنفي په مشرۍ د کور او ښار جوړولو وزارت محترم سرپرست وزیر الحاج شیخ حمدالله نعماني، د بلخ ولایت په نهرشاهي ولسوالۍ کې اجباري راستنېدونکو بې وزله کورنیو ته استوګنیزې نمرې ووېشلې.
په هغه مراسمو کې چې په همدې موخه جوړ شوي وو، د ریاسة الوزرا محترم عالي مقام ښاغلي اداري مرستیال مولوي عبدالسلام حنفي، په نورو هېوادونو کې مېشت افغان کډوالو غږ وکړ، چې خپل هېواد ته راستانه شي، چې دوی ورته باعزته زمینه برابره کړې ده.
محترم مولوي عبدالسلام حنفي وویل، له بده مرغه چې ګاونډي هېوادونه د ټولو ملي، سیمه ییز او نړیوالو اصولو او قوانینو خلاف له افغان کډوالو سره ناوړه چلند کوي او په ځینو مواردو کې یې شتمني هم لوټي.
نوموړي په اسلامي هېوادونو او خیریه مؤسساتو هم غږ وکړ، چې خپل انساني او اسلامي مسؤلیت اداء کړي او د افغان کډوالو لاسنیوی وکړي.
په ورته وخت کې د کور او ښار جوړولو وزارت محترم سرپرست وزیر الحاج شیخ حمدالله نعماني وویل، خوښ دی چې د خپلو مهاجرو ورونو خدمت کوي او په کوردننه ورته د دایمي مېشتېدو لپاره زمینه برابروي.
ښاغلي شیخ حمدالله نعماني وویل، اسلامي امارت مهاجرو ورونو ته په درنه سترګه ګوري او همدا لامل دی چې په لوړه کچه کمېسیون یې جوړ کړی او شپه او ورځ د مهاجرو په خدمت کې بوخت دي.
نوموړي وویل، د تېرې شل کلنې دورې په مهال هم ځینو ولایتونو لپاره پلانونه جوړ شوي وو، خو په خبره یې بې شمېره ستونزې یې درلودې، زیربناء یې نه وي، نمرې یې کوچنۍ وې او داسې نوروې ستونزې یې درلودې، چې اوس دوی ټولې ستونزې حل کړي دي.
په مراسمو کې د بلخ محترم والي الحاج محمد یوسف وفا هم خبرې وکړې او وویل، دوی ویاړي چې د خپلو مهاجرو ورونو خدمت کوي او ټوله ولایتي اړونده اداره به یې خدمت وکړي.
د بلخ ولایت په نهرشاهي ولسوالۍ کې د اجباري راستنېدونکو کډوالو لپاره د ښارګوټي پلان په (۳۱۰۰) جریبه ځمکه کې جوړ شوی، چې (۳۱۵۰) استوګنیزې نمرې لري، چې (۵۰۰) یې پنځلس بسوه یي نمرې، (۷۰۰) یې لس بسوه یې او (۱۹۵۰) یې بیا پنځه بسوه یي نمرې دي.
یاد ښارګوټي کې (۲۰۰) نمرې بلند منزل دي، سوداګریز مارکېټونه (۱۹) مسجدونه، مدرسه، دولس ښوونځي، روغتیایي کلینیکونه، روغتون، ناحیوي او عمومي پارکوونه، کتابتونونه، زرغونې ساحې او د ژوند اړوند نورې د اړتیا وړ ساحې شاملې دي.
