د کابل ښار په یوولسمه ناحیه کې د ودانیو د جوړولو له چارو څارنه وشوه
۱۴۴۸/۴/۲۱
د کور او ښار جوړولو وزارت د کنټرول، کیفیت او ښاري سرغړونو د مخنیوي عمومي ریاست اړوند د ښاري سرغړونو د مخنیوي ریاست تخنیکي ټیم، د خپل کاري پلان له مخې، د کابل ښار د یوولسمې ناحیې د پنځم ګذر اړوند له ګولایي مسجد ابوبکر صدیق څخه تر پنجشیر واټ او د هغه له فرعي کوڅو پورې د ودانیو د جوړولو له چارو څخه تخنیکي څارنه او ارزونه ترسره کړه.
د څارنې پر مهال هغه ودانیزې پروژې وکتل شوې چې د نافذه قوانینو، منظور شوو ښاري پلانونو او د ګاونډیانو د حریم د احتمالي سرغړونو نښې یې لرلې، چې له ډلې یې د غیرقانوني کړکیو او جالیو جوړول هم شامل دي.
همدارنګه، له هغو ودانیو د مالکانو څخه چې د خپلو پروژو رسمي اسناد، جوازونه او اړوند مدارک یې نه وو وړاندې کړي، غوښتنه وشوه چې یاد اسناد د ښاري سرغړونو د مخنیوي ریاست ته وسپاري، څو له تخنیکي ارزونې او منظور شوو پلانونو سره له مطابقت وروسته، د سرغړونې د تثبیت په صورت کې قانوني اقدامات ترسره شي.
د دې څارنو موخه د منظور شوو ښاري پلانونو له مخې د ودانیو د جوړولو ډاډ، د بې نظمۍ او بې ځایه تراکم مخنیوی، د ګاونډیانو د حریم او حقونو ساتنه او د ودانیزو چارو د کیفیت لوړول دي.
د ښاري سرغړونو د مخنیوي ریاست د کاري پلان له مخې، په کابل ښار کې د ودانیو څارنې په دوامداره او هدفمند ډول ترسره کېږي او د هر ډول سرغړونې په صورت کې به د نافذه قوانینو له مخې لازم اقدامات ترسره شي.
