د راستنېدونکو مهاجرو د استوګنې بلاکونو د پروژې له روانو چارو هر اړخیزه څارنه ترسره شوه
۱۴۴۷/۹/۱۴
میدان وردګو ولایت کې د کور او ښار جوړولو محترم ریاست اړوند تخنیکي او مسلکي ټیم د راستنېدونکو مهاجرو د استوګنې بلاکونو د جوړولو پروژې له روانو چارو تخنیکي او ساحوي څارنه ترسره کړه.
موخه یې د کار کیفیت ارزونه، د انجنيري معیارونو رعایت او د پروژې د پرمختګ معلومول وو.
یاده څارنه د کور او ښار جوړولو وزارت، له ښاري سرغړونو د مخنیوي او د انکشافي پروژو پر تطبیق د څار محترم عمومي ریاست په همغږۍ ترسره شوه.
د څارنې پر مهال څرګنده شوه چې د یادو بلاکونو لپاره د سپټيک څاه د فرش د سیخ تړلو چارې په بشپړ ډول پای ته رسېدلې دي.
دغه پړاو د تخنیکي مشخصاتو له مخې اجرا شو او د اړوندو انجنیرانو له لوري تائید شو.
دغه راز، د فرش د قالب تړلو چارې په چټکۍ سره روانې دي او تخنیکي ټیم لازمې سپارښتنې وکړې، څو د کانکرېټ اچولو لپاره ټول شرایط په معیاري ډول برابر شي.
ټاکل شوې چې د نوموړي فرش د (RCC) کانکرېټ اچولو هم ترسره شي، چې په مهال به یې د کیفیت کنټرول ځانګړې پاملرنه وشي، څو د پایښت، استحکام او تخنیکي معیارونو رعایت یقیني شي.
قراردادي ټیم ته لارښوونه وشوه چې پاتې چارې هم د منظور شوې نقشې، تخنیکي طرزالعمل او ټاکل شوي مهالوېش مطابق پر مخ یوسي، څو پروژه په معیاري ډول او پر وخت بشپړه شي.
یاده پروژه د راستنېدونکو مهاجرو لپاره د مناسبې سرپناه برابرولو په موخه پلي کېږي، چې په بشپړېدو سره به لسګونه کورنۍ له بنسټیزو استوګنیزو اسانتیاوو برخمنې شي.
