د کابل په نوي ښار کې د سرطاني ناروغانو د روغتون د ودانۍ د څارنې د کمیټې غونډه ترسره شوه
۱۴۴۷/۰۳/۲۹
د سرطاني ناروغانو د روغتون د اعمار او جوړېدو د څارنې د کمیټې غونډه، چې ټاکل شوې د عطا د خیریه بنسټ لهخوا د کابل په نوي ښار کې جوړه شي، د کور او ښار جوړولو وزارت، د مسکن، ودانیزو چارو او د برنامو د پراختیا د معینیت د محترم مرستیال مولوي ګل زرین صابر په مشرۍ ترسره شوه.
په دې غونډه کې د مسکن مرستیال د یو شمېر رئیسانو ترڅنګ د اطلاعاتو او فرهنګ، عدلیې، کورنیو چارو، اقتصاد، عامې روغتیا وزارتونو، د چارو د ادارې عمومي ریاست او د استخباراتو عمومي ریاست استازو هم ګډون کړی و.
د غونډې په پیل کې د مسکن محترم مرستیال خبرې وکړې او څرګنده یې کړه چې د غونډې موخه د سرطاني ناروغانو د روغتون د جوړېدو د څارنې لپاره د کاري لایحې ترتیب او تدوین او همدارنګه د ریاستالوزرا د محترم عالي مقام د حکم تطبیقول دي.
هغه زیاته کړه چې کمیټه ریاستالوزرا محترم عالي مقام د حکم پر بنسټ ټاکل شوې څو د روغتون د جوړیدو د پروژې ټول مالي، تخنیکي او چاپېریالي اړخونه وڅېړي او د څارنې د لایحې له لارې اړینې همکارۍ ترسره کړي.
محترم مولوي صابر وویل چې یاد روغتون به د یولس جریبه ځمکې په مساحت کې د کابل په نوي ښار کې جوړېږي او د احاطې کار یې بشپړ شوی دی.
وروسته د عطا خیریه بنسټ مسؤلینو د کاري پلان، د ځمکې اسنادو، له عامې روغتیا وزارت سره د هوکړه لیک، د مرستو د راټولولو طریقه او مالي لګښتونو، او همدارنګه له ځینو بهرنیو روغتونونو سره د همکارۍ په اړه د کمیټې غړو ته لازم وضاحتونه وړاندې کړل او د هغوی پوښتنو ته یې ځوابونه وویل.
د غونډې په پای کې د کمیټې غړو هر یو خپلې نظریې او لیدلوري د موضوع او د لایحې د ترتیب او د څارنې د همغږۍ په اړه وړاندې کړل او د راتلونکو غونډو د ترسره کېدو په اړه پرېکړې وشوې.
د یادولو ده چې په دې وروستیو کې د ریاستالوزرا د محترم عالي مقام لخوا یوه کمیټه د کور او ښار جوړولو وزارت په مشري او د اطلاعاتو او فرهنګ، عدلیې، کورنیو چارو، اقتصاد، عامې روغتیا وزارتونو، د چارو د ادارې عمومي ریاست، د استخباراتو عمومي ریاست او د چاپېریال ساتنې په ګډون ټاکل شوې ده څو د عطا د خیریه بنسټ د سرطاني ناروغانو د روغتون د اعمار د پروژې د تخنیکي، مالي او چاپېریالي برخو څارنه او ارزونه وکړي او اړینې همغږۍ ترسره کړي.
