د کور او ښار جوړولو رئیس په عینومینه کې د دوو مهمو ودانیو له چارو لیدنه وکړه
۱۴۴۷/۳/۱
د کندهار ولایت د کور او ښار جوړولو ریاست محترم رئیس مولوي عبدالمتین سعید وایي، د دې ریاست اړوند تخنیکي ټيم د عینومینې په سیمه کې د پیښو پر وړاندې د مبارزې ریاست او د استیناف څارنوالۍ ریاست د نوو ودانیو له ساختماني چارو څخه څارنه وکړه.
ښاغلي مولوي سعید وویل، د لیدنې پر مهال د قراردادي شرکتونو مسؤلینو ته سپارښتنه وشوه، چې په ساحه کې موجودې ستونزې او نواقص ژر تر ژره حل کړي او همدارنګه یې د شرکتونو ساحوي استازو او انجنیرانو ته هدایت وکړ چې ټول ساختماني فعالیتونه د انجنیري معیارونو او نقشي سره سم پرمخ یوسي.
د یادولو وړ ده، د پیښو پر وړاندې د مبارزې ریاست او د استیناف څارنوالۍ ودانۍ د کور او ښار جوړولو وزارت له مهمو پروژو څخه دي، چې بشپړېدل به یې په کندهار کې د عدلي، قضایي او اداري خدمتونو د معیاري کېدو او اغېزمنتیا په برخه کې مثبت بدلونونه رامنځته کړي.
