د چارو د لا ښه والي او تنظیم په موخه له اداري دفترونو لیدنه او ارزونه وشوه
۱۴۴۶/۴/۱۷
د کور او ښار جوړولو وزارت محترم مالي او اداري مرستیال الحاج محمد ارسلاح خروټي د یو شمېر رئیسانو مسؤلینو په شتون کې د وزارت اړوند له ځینو اداري او خدماتي دفترونو لیدنه او ارزونه وکړه.
دمګړۍ د کور او ښار جوړولو وزارت اداري او خدماتي څانګې د کابل په څلورو برخو، سینمای پامیر، د نهمې ناحیې اړوند افغاني دستګاه، څلورم مکروریانو سیمه او خپله په درېیم مکروریانو سیمه کې د وزارت دفترونه ځای په ځای شوي چې ځینې چارې یې له خنډ سره مخامخ کړي دي.
موخه دا ده چې څنګه کېدای شي ټول دفترونه تر واحد چتر لاندې په ارامه او مناسبه فضاء کې خپلې چارې پر مخ یوسي او هېوادوالو ته خدمات وړاندې کړي.
ښاغلي مرستیال محمد ارسلاح خروټي وویل، د چارو د تنظیم، چټکتیا او لا ښه والي په موخه به یو شمېر ریاستونه د اوس لپاره د وزارت په مرکزي دفترونو کې ځای پر ځای کړي.
ښاغلي مرستیال وویل، د وزارت اړوند ټول ریاستونه او ادارې که یو ځای شي، چارې به تنظیم، چټکې او دقیقې شي چې ورسره به د هېوادوالو ستونزو ته هم په وخت رسیدنه وشي.
د کور او ښار جوړولو وزارت رهبري هیئت او کارکونکي هڅه کوي، چې د وزارت اړوند چارې په وخت او ښه شکل ترسره شي.
