پېروزي ښارګوټي کې د رهایشي نمرو د تسلیمۍ پروسه پیل شوه
۱۴۴۳/۱۰/۲۴
د ښار جوړولو او ځمکو وزارت د پېروزي هستوګنیز ښارګوټي کې هغه کسانو ته د هستوګنو نمرو د تسلیمۍ بهیر پیل کړ چې قسطونه یې په بشپړه توګه ورکړي دي.
پېروزي پروژه د کابل په ده سبز کې موقعیت لري چې په شپږ فازونو کې د ژوند ټولو اسانتیاوو او امکاناتو ته په کتو د پیاوړو او تجربه لرونکو انجنیرانو لخوا جوړه شوې ده.
د ښار جوړولو او ځمکو وزارت د محترم سرپرست مولوي حمدالله نعماني د لارښوونې پر اساس په یاد ښارګوټي کې د هستوګنیزو نمرو د تسلیمۍ بهیر پیل شو.
تر دې دمه شاوخوا (۳۵) هغه کسانو ته چې ټول قسطونه یې ورکړي دي، خپلې نمرې تسلیم شوي او دغه لړۍ دوام لري.
پېروزي ښارګوټي کې مسجدونه، روغتیایي کلېنیکونه، ښوونځي، پوهنتونونه، سوداګریز مرکزونه، تفریحي پارکونه او شنې ساحې، دودیزې او فرهنګي مجتمع، لوبغالي، کانالېزاسیون، د اوبو رسولو شبکې، ترانسپورت، مخابرات او تکنالوجي، برېښنا او نور د ټولګټو چارو ځایونه او امکانات په پام کې نیول شوي دي.
خلکو ته د کار کولو زمینه برابرول، خلکو ته سرپناه برابرول، د کابل اوسني ښار څخه د نفوسو کموالی، د سالم چاپېریال رامنځته کول، د کورونو او مسکن برخو کې د نرخونو ټیټول او د صنعتي ساحو رامنځته کول چې ورسره به هر اړخیز اقتصاد وده وکړي، د دغه هستوګنیزې پروژې د رامنځته کولو اساسي موخې دي.
