غور ولایت کې د هستوګنیز ښارګوټي لپاره تفصیلي پلان جوړېږي
۱۴۴۶/۱/۱
د کور او ښار جوړولو وزارت د محترم سرپرست وزیر الحاج شیخ حمدالله نعماني په حکم په غور ولایت کې د یو هستوکنیز ښارګوټي د جوړولو لپاره تفصیلي پلان جوړېږي.
یاد تفصیلي پلان د غور ولایت د محترم والي مولوي احمد شاه دین دوست او په دغه ولایت کې د کور او ښار جوړولو د محترم رئیس مولوي غلام یحی ارصاد د غوښتنې پر اساس ترتیبېږي.
د کور او ښار جوړولو وزارت محترم وزیر الحاج شیخ حمدالله نعماني د دې وزارت د ښاري چارو محترم مرستیال شیخ مدارعلي کریمي بامیاني ته دنده وسپارله، تر څو د اړوندو ریاستونو له مسؤلینو او تخنیکي ټیم سره ناسته وکړي او غور ولایت کې د هستوګنیز ښارګوټي د جوړولو لپاره د تفصیلي پلان پر چمتو کولو کار وکړي.
له دې سره سم، د کور او ښار جوړولو وزارت د ښاري چارو محترم مرستیال شیخ مدار علي کریمي بامیاني د سروې، تفصیلي پلان، زیربنا او نورو اړوندو ریاستونو استازو ته دنده وسپارله، چې کاري ټيمونه برابر او د سروې او کروکي په موخه غور ولایت ته ولېږي چې هلته به د والي او د کور او ښار جوړولو ریاست له لوري ته ورته ځمکه په نښه او چارې پیل کړي.
د کور او ښار جوړولو وزارت د غور ولایت له محترم مقام او په دې ولایت کې د کور او ښار جوړولو له محترم ریاست غوښتنه وکړه چې د سروې ټیمونو له ورتګ مخکې دې د یادې ځمکې د تصفیې او د اړتیا وړ نور ټول اسناد کابل کې دغه وزارت ته راواستوي.
