د مهاجرینو د دایمي مېشتېدنې لپاره د استوګنیزو ځمکو د وېش لړۍ دوام لري
۱۴۴۸/۱/۸
د کور او ښار جوړولو وزارت په مشرۍ د مهاجرینو د دایمي مېشتېدنې او ځمکو وېش کمېټې له لوري په بېلابېلو ولایتونو کې راستنو شویو مهاجرو کورنیو ته د استوګنیزو ځمکو د نمرو د وېش لړۍ دوام لري.
د تیرې د سه شنبې په ورځ په پنځو ولایتونو کې سلګونو راستنو شویو کورنیو ته د استوګنې لپاره د استوګنیزې نمرې ووېشل شوې.
په ننګرهار ولایت کې ۶۱۰، په فراه ولایت کې ۳۶۲، په هلمند ولایت کې ۴۸، په بلخ ولایت کې ۱۸۰ او په فاریاب ولایت کې ۱۵۱ راستنو شویو مهاجرو کورنیو ته د استوګنیزې نمرې ورکړل شوې دي.
د یادو شمېرو له مخې، یوازې د همدې ورځې په جریان کې ټولټال ۱۳۵۱ راستنو شویو کورنیو ته د استوګنې ځمکې ووېشل شوې.
تر دې مهاله په ټول هېواد کې د استوګنیزو ځمکو د وېش د بهیر له مخې ۵۱ زره او ۴۲۵ کورنیو ته د استوګنې نمرې ورکړل شوې دي، او دا لړۍ لا هم په منظم او چټک ډول روانه ده.
د یادولو وړ ده، چې دا پروسه د راستنو شویو کورنیو د دایمي استوګنې، ټولنیز ثبات او اقتصادي پیاوړتیا په موخه ترسره کېږي، ترڅو هغوی وکولای شي په خپل ټاټوبي کې خپل ژوند په عزت سره پیل کړي.
