پکتیا ولایت کې د (جي اېچ) روغتونونو د جوړېدو په پار د سروې او ځمکې د تثبیت چارې پیل شوې
۱۴۴۷/۱۱/۲
پکتیا ولایت کې د کور او ښار جوړولو ریاست اړوند د تخنیکي او مسلکي ټیم له لوري، د ګډ ولایتي پلاوي په همغږۍ، د دغه ولایت په بېلابېلو ولسوالیو کې د لس (جي اېچ) روغتونونو د جوړېدو په پار د کروکي، سکېچ او د ځمکې د تثبیت چارې پیل شوې.
دغه چارې د پکتیا ولایت د عامې روغتیا ریاست د غوښتنې او د ولایت محترم مقام د حکم پر بنسټ، د اړوندو مسؤلینو د لارښوونو او د ګډ ولایتي پلاوي په همغږۍ ترسره کېږي، چې په ترڅ کې یې د احمدابا، ډنډپټان، سیدکرم، لجه منګل، ګرده څېړۍ، احمدخېل، میرزکه، روحاني بابا، څمکني او ځاځي اریوب ولسوالیو کې د روغتونونو لپاره ټاکل شوې ځمکې تخنیکي ارزول کېږي.
د یادو فعالیتونو په لړ کې، د پروژو د دقیق تطبیق لپاره د ساحو کروکي او سکېچ ترتیبېږي، د ځمکو حدود تثبیتېږي او اړین تخنیکي معلومات راټولېږي، څو د راتلونکو ساختماني چارو لپاره لازم بنسټ برابر شي.
د دغو روغتونونو جوړول به په یادو ولسوالیو کې د روغتیايي خدمتونو د پراختیا، د خلکو د اساسي اړتیاوو د پوره کولو او د عامې روغتیا د سیستم د پیاوړتیا په برخه کې مهم ګام وي.
