په لغمان ولایت کې د کابل ـ جلالاباد هډې د پمپ سټېشن او موټرو مینځلځای پروژې له چارو څارنه ترسره شوه
۱۴۴۷/۰۹/۲۹
د لغمان ولایت د کور او ښار جوړولو ریاست فني او مسلکي ټیم، په دغه ولایت کې د کابل ـ جلالاباد هډې اړوند د ښاروالۍ د پمپ سټېشن او موټرو مینځلځای پروژې له روانو چارو څخه تخنیکي څارنه ترسره کړه.
دغه چاره، د کور او ښار جوړولو وزارت له ښاري تخلفاتو د مخنیوي او د پروژو پر تطبیق د څار محترم عمومي ریاست په همغږۍ ترسره شوه.
د ساحوي ارزونې په مهال څرګنده شوه چې د تېلو پمپ سټېشن د ودانۍ د کانکریټ اچولو چارې روانې دي.
د کارونو د کیفیت د لا ښه تأمین په موخه، تخنیکي ټیم په ساحه کې د کانکرېټ اړوند لازمې ازموینې هم ترسره شوې، څو د پروژې چارې د منظور شوو تخنیکي معیارونو له مخې په معیاري ډول پرمخ لاړې شي.
په یاده پروژه کې د تېلو پمپ څپرکي او اړوند تعمیر، د تېلو د ذخیرې ټانکونه، موټر مینځلځای، د موټرو مینځلځای تعمیر او دوه باب سپټیک څاګانې شاملې دي.
د معلوماتو له مخې، د یادې پروژې چارې تر دې مهاله شاوخوا ۷۵ سلنه بشپړې شوې دي.
دغه حیاتي پروژه د مهترلام ښاروالۍ له داخلي عوایدو تمویلېږي او ټاکل شوې ده چې له بشپړېدو وروسته به د ښاري خدمتونو د پراختیا، د عامه اسانتیاوو د ښهوالي او د ښاریانو د اړتیاوو د پوره کولو په برخه کې مهم رول ولوبوي.
