له داخلي صنایعو د ملاتړ او پانګونې پراختیا په موخه په هرات ولایت کې د صنعتي پارک د مهمې پروژې د طرحې او ډیزاین چارې بشپړې او منظور شوې
۱۴۴۷/۹/۲۱
د کور او ښار جوړولو وزارت، محترم وزیر الحاج مولوي نجیب الله حیات حقاني په خپل کاري دفتر کې، د هرات ولایت د ګذرې ولسوالۍ د صنعتي پارک پنځم فاز پروژې اړوند تفصیلي پلان منظور کړ.
دغه پلان د کور او ښار جوړولو وزارت او د صنعت او سوداګرۍ وزارت ترمنځ د موجود پروتوکول له مخې، د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په مشرۍ د عملیاتي پلانونو د کمېټې له لوري و ارزول شو او بیا تر کنترول وروسته دا پلان د یاد وزارت د محترم وزیر الحاج مولوي نجیب الله حیات حقاني له لوري په رسمي ډول تصویب شو.
د دغې پروژې په چوکاټ کې یو لړ تخنیکي چارې ترسره شوې دي چې په کې د امکان سنجۍ مطالعې، تخصصي ارزونې، توپوګرافي سروې، هایدرولوژیکي او جیوتخنیکي مطالعې هم شاملې دي چې پر بنسټ یې د صنعتي پارک تفصیلي پلان برابر شو.
د هرات ولایت د ګذرې ولسوالۍ د صنعتي پارک پنځم فاز په شاوخوا (۶۰۰) جریبه ځمکه کې ډیزاین شوی، چې (۱۷۲) صنعتي نمرې په کې په بېلابېلو مساحتونو شاملې دي.
د دغه پارک شاوخوا ۵۰ سلنه ساحه یې صنعتي فعالیتونو ته ځانګړې شوې ده.
په دې پارک کې د پلاستیک، ډبرو، خوراکي توکو، بېلابېلو صنایعو، درملو او د اوسپنې د ویلې کولو په ګډون ګډ صنعتي سکتورونه فعالیت کولی شي.
ټاکل شوې چې د دغه صنعتي پارک په بشپړېدو او ګټې اخیستنې سره به د تولیدي، خدماتي او سوداګریزو سکتورونو په بېلابېلو برخو کې لسګونه زره مستقیم او غیرمستقیم کاري فرصتونه رامنځته شي، چې دا به د صنعتي زیربناوو د پراختیا، د کورنیو تولیداتو د پیاوړتیا او د هېواد د اقتصادي ودې په برخه کې یو مهم ګام وي.
