د خوست ولایت کې د معتادینو د درملنې مرکز د نوې ودانۍ له ودانیزو چارو څارنه ترسره شوه
1447/07/25
د خوست ولایت د کور او ښار جوړولو ریاست د تخلفاتو د نظارت او مراقبت د انجینري ټیم له لوري، د عامې روغتیا ریاست اړوند د معتادینو د درملنې د نوي جوړیدونکي تعمیر څخه ساحوي نظارت ترسره شو، یاده ودانۍ چې د اتیا بستریز او لس اطاقه په بڼه طرحه شوې ده، دا مهال یې د چت د کانکریټ کارونه په ساحه کې روان وو.
د څارنې پر مهال، د کارونو د لا ښه والي په موخه ساحوي انجینر سره تخنیکي نظریات او لازمې لارښوونې شریکې شوې. همدارنګه، اړوند ساحوي انجینر او د قراردادي شرکت مسوولینو ته هدایت ورکړل شو چې د پروژې ټولې ودانیزې چارې د نظارتي انجینرانو سره په بشپړه همغږۍ، د منظور شوو نقشو، انجینري نورمونو او مسلکي اصولو په رڼا کې ترسره کړي.
د معتادینو د درملنې مرکز د خوست ولایت له مهمو ټولنیزو روغتیایي پروژو څخه دی چې موخه یې د درملنې د اسانتیاوو پراختیا او د عامې روغتیا د خدمتونو پیاوړتیا ده.
