د تالقان ښار د اصلاحي پلان د طرحې پر جوړولو ټینګار وشو
۲۶/۲/۱۴۴۷
د کور او ښار جوړولو وزارت ښاري چارو محترم معین شیخ مدارعلي کریمي بامیاني په مشرۍ، د تخار ولایت د کور او ښار جوړولو محترم رئیس مولوي محمد حنیف، د تالقان ښار محترم ښاروال مولوي عبدالغفور سیرت او د اړوند ریاستونو یو شمېر رئیسانو او انجنیرانو په ګډون یوه غونډه ترسره شوه.
په غونډه کې د تالقان ښار د اصلاحی تفصیلي پلان د جوړولو په اړه بحث او نظریات شریک شول.
محترم شیخ مدارعلي کریمي په خپله وینا کې د تخار د کور او ښار جوړولو محترم رئیس او محترم ښاروال ته ښه راغلاست ووایه او ټینګار یې وکړ چې د هېواد آبادۍ او اقتصادي پرمختګ لپاره د ښارونو پراختیا حیاتي اهمیت لري او د ښاري پراختیا په برخه کې باید د معیارونو په رڼا کې جدي پام وشي او په هر ولایت کې ښاروالۍ او د کور او ښار جوړولو ریاستونه اساسي مسؤلیتونه په غاړه لري.
د ښاري چارو محترم مرستیال زیاته کړه، چې تخار ولایت او تالقان ښار له مهمو ښارونو څخه دی، خو تر اوسه پخوانی پلان لري او په ډېرو برخو کې ښار غیرپلاني وده کړې ده.
همدا راز د کور او ښار جوړولو ریاست محترم رئیس مولوي محمد حنیف وویل چې د نوي تفصیلي پلان شدید ضرورت شته، ځکه خلک د ودانیزو چارو غوښتونکي دي، او په دې برخه کې باید جدي پاملرنه وشي.
په ورته وخت کې د تالقان محترم ښاروال مولوي عبدالغفور سیرت، وویل چې په ښار کې ګڼ شمېر ښاري ستونزې شته، ښار پلان نه لري، کوچنی دی او غیرپلاني وده یې کړې ده. هغه زیاته کړه چې اصلاحي تفصیلي پلان په دې ښار کې یوه بنسټیزه اړتیا ده.
مسلکي انجنیرانو او متخصصینو په غونډه کې د پلان د اصلاح ضرورت، د پخواني پلان ستونزې، د ښاري پراختیا فرصتونه، د اصلاحي ټکو څرنګوالی او د پلان د عملي کولو پروسه په تفصیل سره بیان کړه او ټینګار یې وکړ چې د زیربنایي برخو په پام کې نیولو سره باید پلان جوړ شي.
په غونډه کې پرېکړه وشوه چې د اصلاحي پلان طرح کولو، د ښاري پراختیا د امکان سنجۍ مطالعاتو او د ښاري ټکو د تعدیل لپاره ټول حقوقي او تخنیکي اړخونه په پام کې ونیول شي.
په پای کې، محترم شیخ مدارعلي کریمي وویل چې ژر تر ژره باید د وزارت اړوند مسلکي انجنیرانو یوه ډله تالقان ښار ته واستول شي ترڅو ساحوي سروې او د امکانسنجۍ مطالعات د ښاروالۍ په همغږۍ ترسره کړي، د خلکو نظریات ترلاسه کړي او د اصلاحي پلان کارونه په چټکۍ سره پیل شي.
