د میدان ښار پراختیايي ستراتیژیک پلان ته بیا کتنه وشوه
۱۴۴۶/۹/۲۵
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په مشرۍ د ښاري نقشو د ویزه کولو کمېسیون ناسته وکړه.
په دغه ناسته کې، د ملي جامع پلان ریاست محترم رئيس رحمت الله قدیري او د دغه ريتست تخنیکي
ټیم یې د میدان ښار پراختیايي ستراتیژیک پلان تشریح کړ، ګټې، شته ستونزې او حل یې په ګوته کړ او ډاډ یې ورکړ چې د تطبیق لپاره چمتو دی.
دوی زیاته کړه، په میدان ښار کې یې د ټولو اړوندو ادارو او عامو خلکو نظرونه اخیستي او تر هغې وروسته یې په ستراتېژیک پلان کې اصلاحات راوستي دي.
دغه راز، په تېر پلان کې ټول خدمات لکه، صنعتي، استوګنیزې، روغتیایي، مذهبي، ښوونیزې، لوبغالي، تفریحي او شنې ساحې تشریح شوې.
ترڅنګ یې، په دې پلان کې حلقوي سړکونه، ترانسپورتي ترمینلونه او نور ښاري اړین موضوعات په پام کې نیول شوي دي او د هغو برخو د اصلاح غوښتنه وشوه، چې اصلاحاتو ته یې اړتیا وه.
د محترم شیخ بامیاني په مشرۍ کمېسیون په یاد پلان کې د ځینو اصلاحاتو غوښتنه وکړه او یادونه یې وکړه چې یو شمېر برخې دې ور اضافه شي.
د کور او ښار جوړولو وزارت هڅه کوي چې، پلانونه په منظمه توګه او د ژوند ټولو اړتیاوو او اړخونو ته په کتو ترتیب کړي.
