د فاریاب ښاروالۍ له پلانونو سرغړونه کړې ده
۱۴۴۶/۶/۱۷
د کور او ښار جوړولو وزارت د ښاري تخلفاتو د مخنیوي ریاست محترم رئیس مولوي عبالمنان حقاني وایي، فاریاب ولایت ته یې د ریاست اړوند تخنیکي او مسلکي ټیم سفر وکړ، تر څو د ښاري تخلفاتو پېژندنه او مخنیوی وکړي.
ښاغلی مولوي حقاني وایي، تخنیکي ټیم د فاریاب ولایت د کور او ښار جوړولو ریاست د ښاري سرغړونو مخنیوي ولایتي مدیریت سره په ګډه، د فاریاب ولایت ښاروالۍ محترم ریاست سره د همغږۍ او همکارۍ په پار دوه ناستې، یوه د فاریاب له محترم ښاروال مولوي ګل احمد مبشر او بله هغه یې د یادې ښاروالۍ د تخنیکي او مسلکي خدماتو مدیریت له مسؤلینو سره ترسره کړې.
نوموړی وایي، د پلټنو په مهال معلومه شوه، چې خپله د فاریاب ښاروالۍ په ځینو برخو کې د پلان خلاف چارې ترسره کړي دي.
په میمنې ښار کې د سیند په حریم او شنه ساحه کې د ښاروالۍ له لوري د هټیو او د موټر پلورنځی جوړول، د ښار څلورمې ناحیې اړوند د عربخانه سیمې څلور لارې نه تطبیق، د د ځینو ساحو د پلان تعدیل د ښاروالۍ لخوا، چې صلاحیت یې نه لري او د سیند لوېدیځ اړخ، چې په تفصیلي پلان کې شنې ساحې ښودل شوي، خو د ښاروالۍ له خوا هلته د استوګنیزو کورونو لپاره د نمرو وېشل، د سرغړونو هغه بېلګې دي چې خپله ښاروالۍ ترسره کړي دي.
د کور او ښار جوړولو وزارت د تخنیکي او مسلکي ټیم په ناسته کې د یادې ښاروالۍ سره تفاهم وشو، چې یادو برخو ته پاملرنه او مخنیوی یې وشي.
