د روغتون، ښوونیز مرکز او د دارالایتام پر طرحې خبرې وشوې
۱۴۴۵/۱۰/۲۰
د کور او ښار جوړولو وزارت د محترم سرپرست وزیر شیخ حمدالله نعماني په مشرۍ، د عامي روغتیا وزارت، د کار او ټولنیزو چارو وزارت، د کرنې، اوبو او مالدارۍ وزارت، د کابل د محترمې ښاروالۍ او د عزیزي بنسټ د استازو په شتون کې د کابل ښار د اتمې ناحیې اړوند رحمان مینه کې د یو ستر روغتون، ښوونیز مرکز او دارالایتام پر جوړې شوې طرحې خبرې وشوې.
په دې ناسته کې د عزیزي بنسټ لخوا پر جوړې شوې طرحې او د ځمکې پر تثبیت، تفکیک او د ملکیت پر تعدیل د اړوندو ادارو او عزیزي بنسټ استازو خپل نظرونه وړاندې کړل.
د غونډې په دوام د عزیزي بنسټ استازو د کور او ښار جوړولو وزارت له محترم سرپرست وزیر او د اړونده ادارو له استازو د دې طرحې د نهایي کیدو غوښتنه وکړه، زیاته یې کړه که څومره زر یاده طرحه نهایي شي پروژه به زر ګټې اخستنې ته وسپارل شي.
د کور او ښار جوړولو وزارت محترم سرپرست وویل، د عزیزي بنسټ لخوا د ستر روغتون، د عصري او دیني زده کړو ښوونیز مرکز او دارالایتام جوړیدل یوه ملي پروژه ده، ډاډ یې ور کړ، چې اړونده ادارې به ددې پروژې د چارو د چټکتیا په برخه کې پوره همکاري کوي.
د غونډې په پای کې پریکړه وشوه، چې د عامې روغتیا او د کار او ټولنیزو چارو وزارتونو لخوا به یاده طرحه تائیدیږي، د ځمکې تثبیت او تفکیک به کیږي، که چیرې ځمکه دولتي وي، د تعدیل لپاره به د ا.ا.ا د ریاست الوزرا محترم مقام ته به وړاندې کیږي او همداراز به د عزیزي بنسټ لخوا د اړونده ادارو سره اسناد لاسلیک کیږي.
