د ښار جوړولو او ځمکو وزارت د ودانیزو چارو لا پرمختګ او غوره والي په موخه څو بېلا بېلې تګلارې او لارښوونې چمتو او ترتیب کړې
له تحول او د سرپرست وزیر په توګه د ښاغلي مولوي حمد الله نعماني له ګمارنې وروسته د ښار جوړولو او ځمکو وزارت څو بېلا بېلې مقررې، لارښوونې، او تګلارې چموتو او ترتیب کړې چې له امله به یې د تعمیرونو جوړول او ټولې ودانیزې چارې معیاري شي.
په دغه برخه کې د کانکریټي ودانیو، په ودانیو کې د نل غځونې، د ترافیکو ساتنه او څارنه، په ښوونځیو کې د خوندیتوب اساسي او اصولي طرحې، په ودانیو کې د حرارتي او رطوبتي عایق، د تعمیرونو د اوبو ذخیره کولو لپاره د مناسبو پمپونو غوره کولو، او د ښارګوټو او تعمیرونو د داخلي فوارو لپاره لارښوونې ترتیب شوي دي.
دغه راز د ودانیو د معیاري او ستنډرډ کولو لپاره تګلاره برابره شوې لکه د ودانیو تودوخه او تسخین، د ښاري فاضله اوبو د تصفیې سیستم، د پري فابریکیت ساختمانونو طرح او پلې کول، په بېلا بېلو موسمونو کې د ودانیو جوړولو په مهال د کانکریت اچول او له تونلي قالبونو څخه د سالمې ګټې اخیستنې تګلارې جوړې شوې دي.
د ښار جوړولو او ځمکو وزارت ژمن دی چې په هېواد کې ټولې جوړېدونکې ودانۍ او ښارګوټي معیاري، ستنډرډ او په نړیوالو اصولو برابر شي، چې په دغه برخه کې شپه او ورځ هڅې کوي او غواړي هېوادوالو ته مناسب خدمات وړاندې کړي.
