د پنجشیر ولایت په عنابه ولسوالۍ کې د تخنیکي او مسلکي زدهکړو د لیسې د ساحې توپوګرافي سروې بشپړه شوه
۱۴۴۷/۱۱/۰۶
د کور او ښار جوړولو وزارت د سروې او جي ای ایس ریاست د تخنیکي ټیم له لوري، د پنجشیر ولایت په عنابه ولسوالۍ کې د تخنیکي او مسلکي زدهکړو د لیسې د ودانیزې ساحې توپوګرافي سروې بشپړه شوه.
د سروې په جریان کې د ځمکې ارتفاعات، حدود او نور تخنیکي مشخصات د عصري سروې وسایلو په وسیله ثبت او تثبیت شول، څو د یادې لیسې د راتلونکې ودانۍ لپاره معیاري او دقیق معلومات برابر شي. دغه چارې د اړوندو انجنیرانو په همغږۍ او تخنیکي همکارۍ ترسره شوې دي.
د یادونې وړ ده، چې د توپوګرافي سروې تر بشپړېدو وروسته به د ساحې نقشې د وزارت د تخنیکي برخو له لوري طرح او ډیزاین شي او د راتلونکو اجراتو لپاره به اړوندې ادارې ته وسپارل شي.
