د غزني پوهنتون تفصیلي پلان د کور او ښار جوړولو وزارت د محترم وزیر لخوا لاسلیک شو
۱۴۴۸/۴/۹
د کور او ښار جوړولو وزارت محترم وزیر الحاج مولوي نجیبالله حیات حقاني لخوا د غزني پوهنتون تفصیلي پلان لاسلیک شو.
د غزني پوهنتون تفصیلي پلان د شاوخوا ۵۰۰ جریبه ځمکې په محدوده کې طرحه شوی، چې د پوهنتون د علمي، اداري، استوګنیزو او خدماتي اړتیاوو د معیاري تنظیم لپاره بېلابېلې برخې په کې په پام کې نیول شوې دي.
په دې تفصیلي پلان کې د بېلابېلو پوهنځیو ترڅنګ د محصلینو د نارینه لیلیې، د استادانو لیلیې، د استادانو استوګنیزو بلاکونو، ورزشي میدانونو، جوماتونو، کادري روغتون، کتابتون، شنو ساحو، کرنیز فارم او عامه ساحو لپاره ځانګړي ځایونه په پام کې نیول شوي دي.
همدارنګه، د پوهنتون د بنسټیزو او خدماتي اړتیاوو د تأمین په موخه د اوبو رسولو، کانالیزاسیون، برېښنا رسولو او معیاري سړکونو شبکې، د نافذه نورمونو او معیارونو مطابق، په تفصیلي پلان کې تنظیم شوې دي.
یاد پلان د غزني پوهنتون د علمي او اداري پراختیا، د محصلینو او استادانو د اړتیاوو د منظم تأمین او د پوهنتون د فزیکي ودې لپاره د معیاري چاپېریال د رامنځته کېدو زمینه برابروي.
